اسلام آباد(مشرق نامہ):تاجروں اور کاروباری تنظیموں کی درخواست پر فیڈرل بورڈ آف ریونیو (ایف بی آر) نے انکم ٹیکس ریٹرن جمع کرانے کی آخری تاریخ میں 16 دن کی توسیع کر دی ہے۔ اب ٹیکس ریٹرن 31 اکتوبر 2025 تک جمع کرائے جا سکتے ہیں۔
ایف بی آر کے مطابق، یہ فیصلہ مختلف ٹیکس بار ایسوسی ایشنز، چیمبرز آف کامرس اور تاجر تنظیموں کی اپیلوں کے بعد کیا گیا۔
اب تک 51 لاکھ ٹیکس دہندگان نے ریٹرن جمع کرائے ہیں، جو گزشتہ سال اسی مدت کے مقابلے میں 5 لاکھ زیادہ ہیں۔
اس سے قبل 30 ستمبر کو بھی ایف بی آر نے ڈیڈلائن میں 15 دن کی توسیع کی تھی، تاہم ٹیکس ماہرین اور شہریوں نے مزید مہلت کی درخواست کی تھی۔
تاجروں کی سب سے بڑی تنظیم ایف پی سی سی آئی نے بھی حکومت سے 15 اکتوبر سے 31 اکتوبر تک توسیع کی سفارش کی تھی، جسے اب منظور کر لیا گیا ہے۔
ایف پی سی سی آئی کے صدر عاطف اکرام شیخ نے کہا کہ متعدد ٹیکس دہندگان کو مالی دستاویزات حاصل کرنے میں تاخیر، ایف بی آر پورٹل کی تکنیکی خرابیوں اور ERP سسٹم کے انضمام کے مسائل کا سامنا ہے۔
ایف بی آر نے شہریوں سے کہا ہے کہ وہ اس مہلت سے فائدہ اٹھائیں اور جرمانوں سے بچنے کے لیے بروقت ریٹرن جمع کرائیں۔
