مانیٹرنگ ڈیسک (مشرق نامہ) – ایک حالیہ رپورٹ کے مطابق، امریکی صدر ڈونلڈ ٹرمپ کی جانب سے رواں سال عائد کیے گئے محصولات کا بوجھ زیادہ تر امریکی صارفین کو اٹھانا پڑے گا۔
یہ رپورٹ معروف مالیاتی ادارے گولڈمین سیکس کے ماہرین نے تیار کی ہے، جس کے مطابق سال کے اختتام تک 55 فیصد محصولات کی لاگت امریکی صارفین، 22 فیصد امریکی کاروبار، 18 فیصد غیر ملکی برآمد کنندگان، جبکہ 5 فیصد محصولات سے بچنے کی کوششوں کے ذریعے ہضم کر لی جائے گی۔
رپورٹ میں کہا گیا کہ فی الحال امریکی کاروبار زیادہ حصہ برداشت کر رہے ہیں کیونکہ کچھ محصولات حال ہی میں نافذ ہوئے ہیں اور صارفین پر قیمتوں کا بوجھ ڈالنے یا غیر ملکی سپلائرز سے کم قیمتوں پر مذاکرات کرنے میں وقت لگتا ہے۔
ماہرین نے 2019 کے مقابلے میں اس بار صورتحال کو مختلف قرار دیتے ہوئے کہا کہ اس مرتبہ تمام محصولات کا اثر فوری طور پر صارفین تک منتقل نہیں ہوا، کیونکہ کمپنیاں اس بات کا انتظار کر رہی ہیں کہ آیا ان محصولات کو برقرار رکھا جائے گا یا قانونی چیلنجز کے نتیجے میں ختم کر دیا جائے گا۔
رپورٹ کے مطابق، امریکی محصولات نے رواں سال اب تک بنیادی ذاتی استعمال کی قیمتوں (Core Personal Consumption Expenditure) میں 0.44 فیصد اضافہ کیا ہے، جو دسمبر تک بڑھ کر 3 فیصد تک پہنچنے کی توقع ہے۔
