بیجنگ(مشرق نامہ): چین نے امید ظاہر کی ہے کہ پاکستان اور افغانستان وسیع تر مفاد کو مدنظر رکھتے ہوئے تحمل و ضبط کا مظاہرہ کریں، باہمی خدشات کو مذاکرات اور مشاورت کے ذریعے حل کریں، تنازعات میں شدت سے گریز کریں، اور دونوں ممالک و خطے میں امن و استحکام کو مشترکہ طور پر برقرار رکھیں۔ یہ بات چین کی وزارتِ خارجہ کے ترجمان لن جیان نے پیر کے روز اپنی معمول کی پریس بریفنگ کے دوران کہی۔
ترجمان سے جب پاکستان اور افغانستان کے درمیان حالیہ سرحدی جھڑپوں کے بارے میں سوال کیا گیا تو انہوں نے کہا کہ "حال ہی میں پاکستان اور افغانستان کے درمیان جھڑپیں ہوئی ہیں جس کے نتیجے میں تعلقات میں کشیدگی پیدا ہوئی ہے، جس پر ہم گہری تشویش کا اظہار کرتے ہیں۔ پاکستان اور افغانستان دونوں چین کے دوستانہ ہمسائے ہیں۔”
انہوں نے مزید کہا کہ "چونکہ یہ دونوں ایک دوسرے کے ناگزیر ہمسائے ہیں، اس لیے خوشگوار تعلقات کا فروغ، سماجی و معاشی ترقی کا حصول، اور دہشت گردی کے خلاف مشترکہ جدوجہد — دونوں ممالک کے بنیادی اور طویل المدتی مفاد میں ہے۔”
ترجمان لن جیان نے کہا کہ چین پاکستان اور افغانستان کے تعلقات کی بہتری اور ترقی کے لیے تعمیری کردار ادا کرنے کے لیے تیار ہے۔
انہوں نے مزید کہا کہ چین نے دونوں ممالک پر زور دیا ہے کہ وہ چین کے شہریوں، منصوبوں اور اداروں کی سلامتی کو یقینی بنانے کے لیے عملی اقدامات کریں۔
