مانیٹرنگ ڈیسک (مشرق نامہ)آسٹریلیا کے شہر سڈنی میں ایک 60 سالہ شخص نے مصروف سڑک پر اندھا دھند فائرنگ کر کے کم از کم 16 افراد کو زخمی کر دیا۔ پولیس کے مطابق مشتبہ شخص نے اپنی رہائش گاہ سے تقریباً 50 گولیاں چلائیں، جس سے گزرنے والی گاڑیاں اور راہگیر متاثر ہوئے۔
اتوار کی شام پیش آنے والے اس واقعے کے بعد پولیس نے علاقے کو گھیرے میں لے کر کارروائی کی اور فائرنگ کرنے والے شخص کو گرفتار کر لیا۔ موقع سے ایک رائفل بھی برآمد کی گئی۔
پولیس افسر اسٹیفن پیری نے بتایا کہ ان کے 35 سالہ تجربے میں اس نوعیت کا واقعہ انتہائی کم پیش آیا ہے جہاں کوئی شخص سڑک پر لوگوں کو بے ترتیب نشانہ بنائے۔ ملزم کو معمولی زخموں کے باعث اسپتال منتقل کر دیا گیا جبکہ تاحال اس پر کوئی فردِ جرم عائد نہیں کی گئی۔
پولیس کے مطابق حملے کا کوئی تعلق دہشت گردی یا گینگز سے نہیں ملا۔ عینی شاہدین نے فائرنگ کو “خوفناک” اور “کسی فلمی منظر” سے مشابہ قرار دیا۔
آسٹریلیا میں بڑے پیمانے پر فائرنگ کے واقعات شاذونادر ہی ہوتے ہیں، کیونکہ 1996 میں پورٹ آرتھر قتل عام کے بعد خودکار اور نیم خودکار ہتھیاروں پر پابندی عائد کر دی گئی تھی۔
