اسلام آباد(مشرق نامہ) (اے پی پی): وزیرِاعظم انور ابراہیم کی دعوت پر وزیرِاعظم محمد شہباز شریف 5 سے 7 اکتوبر 2025 تک ملائیشیا کا سرکاری دورہ کریں گے۔ دفترِ خارجہ کے مطابق وزیراعظم کے ہمراہ ایک اعلیٰ سطحی وفد بھی ہوگا، جس میں نائب وزیراعظم و وزیرِخارجہ، وفاقی وزرا اور سینئر سرکاری حکام شامل ہوں گے۔
یہ دورہ پاکستان اور ملائیشیا کے درمیان دیرینہ اور مضبوط اسٹریٹجک شراکت داری کی عکاسی کرتا ہے، جو باہمی احترام، مشترکہ مفادات اور مختلف شعبوں میں قریبی تعاون پر مبنی ہے۔
وزیرِاعظم شہباز شریف اپنے ملائیشین ہم منصب سے دوطرفہ مذاکرات کریں گے، جن میں علاقائی و عالمی امور کے ساتھ ساتھ تجارت، سرمایہ کاری، حلال انڈسٹری، تعلیم، توانائی، آئی ٹی و ٹیلی کمیونیکیشن، ڈیجیٹل اکانومی اور عوامی روابط کو فروغ دینے پر تبادلہ خیال کیا جائے گا۔
دونوں رہنما کئی موجودہ اور نئے شعبوں میں تعاون سے متعلق معاہدوں اور مفاہمتی یادداشتوں (MoUs) پر دستخط کی تقریب میں بھی شریک ہوں گے۔
یہ دورہ پاکستان کے ملائیشیا کے ساتھ تعلقات مضبوط بنانے کے عزم کی تجدید کرتا ہے اور دونوں ممالک کے درمیان امن، استحکام، تجارت اور پائیدار ترقی کے فروغ کے مشترکہ عزم کو نمایاں کرتا ہے۔
وزیرِاعظم شہباز شریف 5 اکتوبر سے ملائیشیا کے سرکاری دورے پر روانہ ہوں گےو
