اسلام آباد(مشرق نامہ): وزیرِ خارجہ اسحاق ڈار نے کہا ہے کہ پاکستان امریکی صدر ڈونلڈ ٹرمپ کے 20 نکاتی امن منصوبے کی روشنی میں غزہ کے لیے تجویز کردہ "انٹرنیشنل اسٹیبلائزیشن فورس” (ISF) میں شمولیت پر غور کر رہا ہے۔ انہوں نے بتایا کہ انڈونیشیا نے پہلے ہی 20 ہزار فوجی بھیجنے کی پیشکش کی ہے جبکہ پاکستان کی قیادت اس حوالے سے جلد فیصلہ کرے گی۔
ڈار نے وضاحت کی کہ یہ فورس غزہ کے اندر تعینات نہیں ہوگی بلکہ فلسطینی پولیس اور قانون نافذ کرنے والے اداروں کی معاونت کرے گی، اور اسے اقوام متحدہ کی سلامتی کونسل کی پشت پناہی حاصل ہوگی۔
انہوں نے کہا کہ منصوبے کا مقصد جنگ بندی کرانا، انسانی جانوں کا تحفظ، تباہ شدہ علاقوں کی تعمیر نو اور فلسطینی مہاجرین کی واپسی کو یقینی بنانا ہے۔ ڈار کے مطابق مسلم ممالک کی جانب سے بعض ترامیم کے بعد ہی امریکی مسودے کی توثیق کی گئی، تاکہ اسرائیلی قبضے کے مزید پھیلاؤ کو روکا جا سکے۔
انہوں نے زور دیا کہ پاکستان کا اصولی مؤقف تبدیل نہیں ہوا اور اسلام آباد اب بھی دو ریاستی حل، 1967 کی سرحدوں اور القدس کو فلسطینی ریاست کا دارالحکومت تسلیم کرتا ہے۔ ڈار نے مزید کہا کہ وزیرِاعظم شہباز شریف نے اقوامِ متحدہ کی جنرل اسمبلی کے اجلاس کے دوران متعدد عالمی رہنماؤں سے فلسطین پر حمایت حاصل کرنے کے لیے کامیاب ملاقاتیں کیں، جنہیں عالمی سطح پر سراہا گیا۔
یہ منصوبہ آٹھ مسلم ممالک کی حمایت سے تیار ہوا ہے اور اس کا مقصد غزہ میں خونریزی روک کر فوری انسانی امداد کو ممکن بنانا ہے۔
