اسلام آباد، (مشرق نامہ) ستمبر (اے پی پی): چین کے سفیر جیانگ ژائی ڈونگ نے اتوار کے روز نور خان ایئربیس پر ایک تقریب میں شرکت کی، جہاں چینی حکومت کی جانب سے پاکستان کو آفات سے بچاؤ کے لیے امدادی سامان کی پہلی کھیپ حوالے کی گئی۔ وفاقی وزیر انجینئر امیر مقام اور چیئرمین این ڈی ایم اے لیفٹیننٹ جنرل انعام حیدر ملک بھی موجود تھے۔
تقریب سے خطاب کرتے ہوئے جیانگ ژائی ڈونگ نے کہا کہ صدر شی جن پنگ نے وزیراعظم شہباز شریف سے ملاقات کے دوران کہا تھا کہ چین اور پاکستان آزمائش کی گھڑی کے دوست ہیں اور اصل دوستی مشکل وقت میں ہی ظاہر ہوتی ہے۔
انہوں نے کہا کہ پاکستان میں حالیہ سیلاب کے بعد چین نے مسلسل مالی اور مادی امداد فراہم کی، جو ’’مشترکہ مستقبل کے حامل برادری‘‘ کے جذبے کی عکاسی کرتی ہے، جس میں باہمی تعاون اور دکھ سکھ کی شراکت بنیادی عناصر ہیں۔
چینی سفیر نے کہا کہ اس سال پاکستان کو شدید بارشوں اور سیلاب کا سامنا رہا، جس سے گھروں اور کھیتوں کو نقصان پہنچا اور قیمتی جانیں ضائع ہوئیں۔ انہوں نے یاد دلایا کہ جب 2008 میں چین میں ونچوان زلزلہ آیا تو پاکستان نے اپنے تمام اسٹریٹجک ٹرانسپورٹ طیارے بروئے کار لا کر اپنے تمام اسٹریٹجک ریزرو کے خیمے فوری طور پر متاثرہ علاقے میں پہنچائے۔ ’’ہم اسے کبھی نہیں بھولیں گے۔‘‘
انہوں نے کہا کہ 2010 کے تباہ کن سیلاب میں بھی چین نے پاکستان کو فوری زمینی اور فضائی مدد فراہم کی، تاریخ کی سب سے بڑی میڈیکل ریسکیو ٹیم بھیجی اور یہ چین کی غیر ملکی امداد میں ایک سنگ میل تھا۔
جیانگ ژائی ڈونگ نے بتایا کہ حالیہ سیلاب کے بعد چین نے فوری طور پر پاکستان کو 20 لاکھ ڈالر نقد امداد فراہم کی اور پھر پاکستان کی ضروریات کو مدِنظر رکھتے ہوئے 100 ملین یوان مالیت کا اضافی امدادی سامان دینے کا فیصلہ کیا۔
اتوار کو چین کے دو Y-20 طیارے 300 خیمے اور 9 ہزار کمبل لے کر اسلام آباد پہنچے تاکہ انہیں متاثرہ علاقوں میں جلد از جلد تقسیم کیا جا سکے۔ انہوں نے کہا کہ مزید امدادی سامان فضائی اور بحری راستوں سے بھی بھیجا جائے گا۔ ’’قدرتی آفات بے رحم ہوتی ہیں لیکن انسانیت ہمدردی سے بھری ہوئی ہے۔‘‘
انہوں نے یقین دلایا کہ ’’پاکستانی بھائیوں کو فکر کرنے کی ضرورت نہیں، ہم ہمیشہ آپ کے ساتھ ہیں۔ ہماری خواہش ہے کہ چین اور پاکستان خوشحال رہیں اور ہماری دوستی نسل در نسل قائم رہے۔‘‘
وفاقی وزیر انجینئر امیر مقام نے کہا کہ چین نے ہمیشہ مشکل وقت میں پاکستان کی بروقت مدد کی ہے۔ انہوں نے کہا کہ یہ امدادی پیکج ایک بار پھر پاک-چین آہنی دوستی کو اجاگر کرتا ہے اور متاثرینِ سیلاب کے لیے سہارا فراہم کرتا ہے۔ پاکستان کی حکومت اور عوام چین کے شکر گزار ہیں اور اس امداد کو متاثرہ علاقوں میں زندگی کو جلد بحال کرنے کے لیے استعمال کریں گے۔
