تہران (مشرق نامہ) – ایران کی اسلامی انقلابی گارڈ کور (IRGC) نے حزب اللہ کے شہداء سید حسن نصر اللہ اور سید ہاشم صفی الدین کی برسی پر جاری بیان میں کہا کہ امریکہ اور اسرائیل کی تمام سازشیں ناکام رہیں گی اور دشمن کو رسوائی اور ذلت کے سوا کچھ حاصل نہیں ہوگا۔
بیان میں کہا گیا کہ مزاحمت کوئی ایسا ادارہ نہیں جسے سیاسی یا سکیورٹی کارروائیوں کے ذریعے ختم کیا جا سکے بلکہ یہ ایک زندہ شناخت، فکر اور ثقافت ہے جو خطے کے عوام کے عقیدے میں گہری جڑیں رکھتی ہے اور ہر گزرتے دن کے ساتھ مزید طاقتور ہو رہی ہے۔
پاسداران نے واضح کیا کہ شہداء سید حسن نصر اللہ اور سید ہاشم صفی الدین کی جدوجہد نے مزاحمتی محاذ کو اسلامی امت کی عزت اور ایک ایسی اسٹریٹجک طاقت میں بدل دیا ہے جو علاقائی اور بین الاقوامی سطح پر اہمیت رکھتی ہے۔
مزید کہا گیا کہ پاسداران انقلاب حزب اللہ کے ڈپٹی سیکرٹری جنرل شیخ نعیم قاسم کی مدبرانہ اور جرات مندانہ قیادت کی بھرپور حمایت کرتے ہیں اور لبنان کے تحفظ و مزاحمت کے تسلسل کو یقینی بنانے کے لیے حزب اللہ کی کوششوں کو سراہتے ہیں۔
مزاحمت ہی ظلم کے خلاف واحد راستہ ہے
بیان میں زور دیا گیا کہ ایران اور خطے کی سلامتی سیاسی سودوں یا دھونس دھمکیوں کے آگے جھکنے سے نہیں بلکہ مزاحمت کاروں کی قربانیوں سے ممکن ہوئی ہے۔ اسی لیے مزاحمت کو ظلم کے خلاف جدوجہد کا واحد منطقی راستہ قرار دیا گیا۔
پاسداران نے کہا کہ تاریخی تجربات اور زمینی حقائق اس بات کی تصدیق کرتے ہیں کہ فعال اور باشعور مزاحمت ہی عالمی استکبار اور صہیونیت کے عزائم کو روکنے کا مؤثر ترین طریقہ ہے، اور کسی بھی پسپائی یا ذلت آمیز سمجھوتے سے دشمن کے حوصلے مزید بڑھیں گے اور خطرات میں اضافہ ہوگا۔
بیان میں یہ بھی کہا گیا کہ صہیونی ریاست کے بڑھتے ہوئے جرائم اور غزہ میں اس کی ناکامی اس حقیقت کو اجاگر کرتے ہیں کہ مزاحمت کا محاذ ناقابلِ شکست ہے اور اس کی شعلہ بار روح کو بجھایا نہیں جا سکتا۔
