مانیٹرنگ ڈیسک (مشرق نامہ)– نیویارک میں مظاہرے کے دوران امریکی فوجیوں کو ڈونلڈ ٹرمپ کے احکامات نہ ماننے کی اپیل کرنے پر امریکہ نے کولمبیا کے صدر گستاوو پیٹرو کا ویزا منسوخ کرنے کا اعلان کیا ہے۔ امریکی محکمہ خارجہ نے اسے "بے احتیاط اور اشتعال انگیز اقدام” قرار دیا۔
کولمبیا کے صدر کو جمعہ کی سہ پہر نیویارک میں فلسطین کے حق میں ہونے والے ایک مظاہرے سے میگا فون پر خطاب کرتے دیکھا گیا۔ اس سے قبل وہ اقوام متحدہ کی جنرل اسمبلی کے 80ویں اجلاس سے خطاب کر چکے تھے، جہاں انہوں نے امریکی خارجہ پالیسی پر کھل کر تنقید کی اور سابق صدر ڈونلڈ ٹرمپ کے خلاف قانونی کارروائی کا مطالبہ کیا۔
محکمہ خارجہ نے سوشل میڈیا پلیٹ فارم ایکس پر بیان میں کہا کہ ہم صدر پیٹرو کا ویزا ان کے بے احتیاط اور اشتعال انگیز اقدامات کے باعث منسوخ کر رہے ہیں۔ وہ نیویارک کی ایک سڑک پر کھڑے ہوکر امریکی فوجیوں کو احکامات نہ ماننے اور تشدد پر اکسانے کی ترغیب دے رہے تھے۔
جمعے کو اس وقت نیویارک بھر میں احتجاجی مظاہرے ہوئے جب اسرائیلی وزیر اعظم بن یامین نیتن یاہو نے اقوام متحدہ میں خطاب کیا۔ ہزاروں مظاہرین مین ہیٹن کی سڑکوں پر مارچ کرتے ہوئے جنگ بندی کا مطالبہ کر رہے تھے اور نیتن یاہو کو "جنگی مجرم” قرار دے رہے تھے۔
صدر پیٹرو نے ہجوم کو خطاب کرتے ہوئے کہا کہ ٹرمپ کے احکامات نہ مانو — انسانیت کے احکامات مانو۔ انہوں نے مزید کہا کہ میں بطور ایک مسیحی ان امریکی فوجیوں کی قبروں پر جھکا ہوں جو یورپ کی جنگی سرزمین پر ہٹلر کے خلاف لڑتے ہوئے مارے گئے۔ وہی آج کے ملاحوں اور فوجیوں کے دادا ہیں۔ امریکی فوج کو مثال قائم کرنی چاہیے۔ وہ دنیا بھر کی اقوام کے ساتھ عظیم اتحاد میں شامل ہیں۔
پیٹرو نے منگل کو اپنے یو این خطاب میں مغربی طاقتوں کو سخت تنقید کا نشانہ بنایا، امریکہ پر عالمی عدم مساوات کو بڑھانے کا الزام عائد کیا اور غزہ کی جنگ کو "نسل کشی” قرار دیا۔
ان کے الفاظ تھے کہ ٹرمپ اجازت دیتے ہیں کہ غزہ میں بچوں، خواتین اور بزرگوں پر میزائل داغے جائیں، جس سے وہ نسل کشی کے شریکِ جرم بن جاتے ہیں۔
امریکی محکمہ خارجہ نے یہ واضح نہیں کیا کہ صدر پیٹرو کو فوری طور پر ملک بدر کیا جائے گا یا اس فیصلے کا مستقبل کی سفارتی مصروفیات پر کیا اثر پڑے گا۔ کولمبیا کی حکومت نے تاحال کوئی سرکاری ردعمل ظاہر نہیں کیا۔
