مانیٹرنگ ڈیسک (مشرق نامہ)–بیلجیم نے اعلان کیا ہے کہ وہ ستمبر میں اقوام متحدہ کی جنرل اسمبلی میں فلسطینی ریاست کو باضابطہ طور پر تسلیم کرے گا۔ وزیر خارجہ ماکسم پریوو نے منگل کو کہا کہ غزہ میں جاری انسانی المیے اور "اسرائیل” کی جانب سے بین الاقوامی قوانین کی خلاف ورزیوں کے پیش نظر یہ فیصلہ کیا گیا ہے۔
انہوں نے سوشل میڈیا پلیٹ فارم ایکس پر لکھا کہ فلسطین کو اقوام متحدہ کے اجلاس میں تسلیم کیا جائے گا اور ساتھ ہی اسرائیلی حکومت کے خلاف سخت پابندیاں بھی عائد کی جا رہی ہیں۔
جولائی میں فرانسیسی صدر ایمانوئل میکرون نے اعلان کیا تھا کہ فرانس ستمبر میں نیویارک میں ہونے والے یو این اجلاس میں فلسطینی ریاست کو تسلیم کرے گا۔ اس کے بعد ایک درجن سے زائد ممالک نے اسی سمت میں عزم ظاہر کیا۔
پریوو نے کہا کہ یہ فیصلہ غزہ میں جاری "انسانی المیے” کو دیکھتے ہوئے کیا گیا ہے، جہاں اسرائیلی حملوں نے بیشتر آبادی کو بار بار بے گھر کر دیا ہے اور اقوام متحدہ نے قحط کی صورتحال کا اعلان کیا ہے۔ انہوں نے واضح کیا کہ یہ اقدام اسرائیلی عوام کے خلاف نہیں بلکہ ان کی حکومت کو بین الاقوامی اور انسانی قوانین کا احترام کرنے پر مجبور کرنے کے لیے ہے۔
غزہ میں نسل کشی کی توثیق
یہ اعلان ایسے وقت سامنے آیا ہے جب غزہ میں اسرائیلی جنگ ہزاروں جانیں نگل رہی ہے اور دنیا کی سرکردہ تنظیم انٹرنیشنل ایسوسی ایشن آف جینوسائیڈ اسکالرز (IAGS) نے باضابطہ طور پر قرار دیا ہے کہ غزہ میں ہونے والے واقعات نسل کشی کے زمرے میں آتے ہیں۔
یکم ستمبر کو اس ادارے نے ایک قرار داد منظور کی، جس کے مطابق اسرائیلی پالیسیاں اور اقدامات 1948 کے اقوام متحدہ کے کنونشن برائے انسداد نسل کشی کے آرٹیکل دوم کے تحت نسل کشی کی تعریف پر پورا اترتے ہیں۔ اس قرارداد کے حق میں 86 فیصد اراکین نے ووٹ دیا۔
یہ پیش رفت اس وقت سامنے آئی ہے جب اسرائیل کے خلاف ہیگ میں بین الاقوامی عدالتِ انصاف میں جنوبی افریقہ کی جانب سے نسل کشی کا مقدمہ بھی جاری ہے۔ ناقدین کا کہنا ہے کہ اسرائیلی افواج کے شہریوں پر منظم حملے، مکانات کی تباہی اور خوراک و امداد روکنا اجتماعی نسل کشی کے واضح مظاہر ہیں۔
غزہ کی وزارت صحت کے مطابق 7 اکتوبر 2023 سے اب تک شہدا کی مجموعی تعداد 63,557 اور زخمیوں کی تعداد 160,660 تک جا پہنچی ہے، جبکہ مارچ 2025 کے بعد سے ہی 11,426 فلسطینی شہید اور 48,619 زخمی ہو چکے ہیں۔
