مقبوضہ فلسطین (مشرق نامہ) – اسرائیلی میڈیا نے دعویٰ کیا ہے کہ شام اور اسرائیلی قبضے کے درمیان سیکیورٹی معاہدے پر پیش رفت جاری ہے، جس میں لندن میں مذاکرات اور باکو میں ایک مجوزہ ملاقات شامل ہے، جس میں امریکہ ثالثی کا کردار ادا کر رہا ہے۔
اسرائیلی نشریاتی ادارے i24NEWS نے جمعہ کو رپورٹ کیا کہ شام کے عبوری صدر احمد الشرع سے منسلک ایک ذریعے نے بتایا ہے کہ اسرائیلی حکومت، شام اور امریکہ کے درمیان ایک سہ فریقی ملاقات متوقع ہے، جس کا مقصد ایک ’’سیکیورٹی معاہدے‘‘ تک پہنچنا ہے۔
اسی ذریعے کے مطابق گزشتہ دو ہفتوں میں اس معاہدے پر دستخط کے لیے ’’بہت اہم پیش رفت‘‘ ہوئی ہے۔ اس کے ساتھ ہی ایک شامی رپورٹ کا حوالہ دیتے ہوئے کہا گیا کہ جمعہ کو آذربائیجان کے دارالحکومت باکو میں شام اور اسرائیل کے درمیان ملاقات متوقع ہے۔
’اسرائیل سے معاہدہ ناگزیر ہے‘
شامی عبوری صدر احمد الشرع نے بدھ کے روز ان مذاکرات کی تصدیق کی اور کہا کہ جاری سیکیورٹی بات چیت آئندہ دنوں میں نتائج دے سکتی ہے۔ یہ امریکی ثالثی میں ہونے والی بات چیت پر پیش رفت کی سب سے واضح اقرار ہے۔
الشرع نے زور دیا کہ کوئی بھی ممکنہ معاہدہ ’’ناگزیر‘‘ ہے، لیکن اس کی کامیابی شامی خودمختاری کے احترام پر منحصر ہو گی۔ ان کے مطابق معاہدے کو شام کی فضائی حدود اور علاقائی سالمیت کی ضمانت دینا ہو گی۔
انہوں نے واضح کیا کہ ’’امن اور تعلقات کی بحالی اس وقت ایجنڈے پر نہیں‘‘۔ ان کے بقول موجودہ بات چیت صرف سیکیورٹی کشیدگی کو کم کرنے اور موجودہ جنگ بندی معاہدوں پر دوبارہ زور دینے سے متعلق ہے۔
جارحیت اور قبضے کے سائے میں مذاکرات
اسرائیلی میڈیا نے جمعرات کو اطلاع دی کہ لندن میں اسرائیلی وزیر برائے اسٹریٹجک امور رون ڈرمر اور الشیبانی کے درمیان پانچ گھنٹے طویل ملاقات ہوئی، جس میں امریکی ثالث بریک موجود تھے۔
رپورٹس کے مطابق اس ملاقات میں شام نے اسرائیلی تجویز پر باضابطہ جواب دیا۔ تاہم اسرائیلی میڈیا نے شکوک و شبہات ظاہر کرتے ہوئے کہا کہ قریبی مدت میں معاہدے کے امکانات کم دکھائی دے رہے ہیں، باوجود اس کے کہ امریکی صدر ڈونلڈ ٹرمپ کی جانب سے ’’شدید مداخلت‘‘ جاری ہے۔
یہ بات چیت ایسے وقت میں ہو رہی ہے جب اسرائیل مسلسل شامی سرزمین پر فضائی حملے کر رہا ہے، جنوبی شام میں فوجی چوکیوں پر قابض ہے اور زمینی دراندازیاں بھی جاری رکھے ہوئے ہے۔ دمشق کی جانب سے عوامی سطح پر اسرائیلی جارحیت اور مداخلت کی مذمت کی جاتی رہی ہے، اور حکومت کا موقف ہے کہ جنوبی شام ملک کا لازمی حصہ ہے۔
بنیادی نکات پر اختلاف
بات چیت میں مرکزی نکات میں 1974 کے علیحدگی معاہدے کے تحت مانیٹرنگ میکنزم کو فعال کرنا، اسرائیلی فضائی خلاف ورزیوں کو روکنا اور مزید واضح سیکیورٹی اصول وضع کرنا شامل ہیں۔ اسرائیل نے غیر فوجی زونز اور سلامتی کی ضمانتیں طلب کی ہیں جبکہ شام نے خودمختاری اور علاقائی وحدت کو اپنی سرخ لکیر قرار دیا ہے۔
