کوئٹہ (مشرق نامہ): جمعرات کو بلوچستان میں تشدد کے مختلف واقعات میں 6 افراد جاں بحق جبکہ 4 دہشتگرد ہلاک کر دیے گئے۔
چمن میں پاک-افغان سرحد کے قریب ٹیکسی اسٹینڈ پر زور دار بم دھماکے میں 6 افراد اپنی جانوں سے گئے۔ عینی شاہدین کے مطابق دھماکے کے بعد لاشیں بری طرح مسخ اور اعضاء بکھر گئے۔ پولیس کا کہنا ہے کہ دھماکہ عارضی دکانوں کے قریب نصب بارودی مواد سے ہوا۔ صوبائی محکمہ داخلہ نے تحقیقات کا حکم دے دیا۔
اسی روز کیچ ضلع کے دشتِ کوددان علاقے میں گوادر سے تربت جانے والا ایک قافلہ فائرنگ اور خودکش حملے کی زد میں آیا۔ حملہ آور نے بارود سے بھری پک اپ گاڑی قافلے کی بس سے ٹکرا دی۔ تاحال جانی نقصان کی تصدیق نہیں ہو سکی۔ کالعدم بلوچ لبریشن آرمی (BLA) نے حملے کی ذمہ داری قبول کر لی۔
دوسری جانب آئی ایس پی آر کے مطابق خضدار میں انٹیلی جنس بیسڈ آپریشن کے دوران ’’فتنہ الہندستان‘‘ نامی بھارتی پراکسی گروپ کے 4 دہشتگرد مارے گئے۔ آپریشن میں اسلحہ، گولہ بارود اور بارودی مواد برآمد ہوا۔ فوجی ترجمان کا کہنا ہے کہ علاقے میں کلیئرنس آپریشن جاری ہے اور دہشتگردی کے خاتمے تک کارروائیاں جاری رہیں گی۔
مزید برآں قلات ڈویژن کے منگوجار علاقے میں نامعلوم افراد کے دستی بم حملے اور فائرنگ سے ایف سی کے دو اہلکاروں سمیت چار افراد زخمی ہوئے۔
یہ حملے ایسے وقت میں ہوئے ہیں جب حالیہ دنوں میں بلوچستان میں دہشتگردی کی کارروائیوں میں اضافہ دیکھنے میں آ رہا ہے۔ گزشتہ ہفتے مستونگ اور خضدار میں بھی فورسز نے کئی دہشتگرد ہلاک کیے تھے۔
