اسلام آباد(مشرق نامہ):وزیرِاعظم شہباز شریف 15 ستمبر کو قطر کے دارالحکومت دوحہ میں ہونے والے ہنگامی عرب۔اسلامی سربراہی اجلاس میں شرکت کریں گے۔
یہ اجلاس، جس کی مشترکہ میزبانی پاکستان بھی کر رہا ہے، اسرائیل کے دوحہ پر فضائی حملوں اور فلسطین میں بڑھتی ہوئی کشیدگی کے تناظر میں بلایا گیا ہے۔ اسرائیلی اقدامات میں غزہ پر قبضے کی کوششیں، مقبوضہ مغربی کنارے میں آبادکاری کے منصوبوں میں اضافہ اور فلسطینیوں کو زبردستی بے دخل کرنا شامل ہے۔
قطر نے حالیہ علاقائی صورتحال کے پیشِ نظر اس اجلاس کا اعلان کیا تھا۔ قطری وزارتِ خارجہ کے ترجمان ماجد الانصاری نے کہا کہ پیر کو ہونے والے اجلاس میں "قطر پر اسرائیلی حملے سے متعلق ایک مسودہ قرارداد” پر غور کیا جائے گا، جسے 14 ستمبر کو وزرائے خارجہ کے اجلاس میں تیار کیا جائے گا۔
گزشتہ منگل اسرائیل نے دوحہ میں حماس کے رہنماؤں کو نشانہ بنایا، جس میں حماس کے پانچ ارکان اور ایک قطری سکیورٹی اہلکار جاں بحق ہوئے۔ اس حملے کی وسیع پیمانے پر عالمی سطح پر مذمت کی گئی، حتیٰ کہ امریکہ کے قریبی خلیجی اتحادی ممالک نے بھی اسے مسترد کیا۔
قطری خبر رساں ادارے "قنا” کے مطابق الانصاری نے کہا کہ یہ اجلاس "اسرائیل کی بزدلانہ جارحیت کے مقابلے میں قطر کے ساتھ وسیع عرب اور اسلامی یکجہتی اور اسرائیلی ریاستی دہشت گردی کی دوٹوک مذمت” کی عکاسی کرتا ہے۔
اس اجلاس میں او آئی سی کے رکن ممالک کے سربراہان، وزرائےاعظم، صدور اور اعلیٰ حکام کی شرکت متوقع ہے۔ اجلاس سے قبل 14 ستمبر کو وزرائے خارجہ کا تیاری اجلاس ہوگا جس میں پاکستان کی نمائندگی نائب وزیرِاعظم و وزیرِخارجہ سینیٹر اسحاق ڈار کریں گے۔
ترجمان دفترِ خارجہ کے مطابق پاکستان قطر کے ساتھ اپنے تعلقات کو انتہائی اہمیت دیتا ہے اور قطر سمیت دیگر خطے کی ریاستوں کے خلاف اسرائیلی جارحیت کی شدید مذمت کر چکا ہے۔ پاکستان کے وزیرِاعظم نے 11 ستمبر کو دوحہ کا دورہ بھی کیا تھا جہاں انہوں نے قطری قیادت سے ملاقات میں قطر کی سلامتی اور خودمختاری کے لیے پاکستان کی غیر متزلزل حمایت کا اعادہ کیا۔
