اسلام آباد، 10(مشرق نامہ) ستمبر (اے پی پی):اسلامی تعاون تنظیم (او آئی سی) نے منگل کے روز قطری دارالحکومت دوحہ کو نشانہ بنانے والی اسرائیلی جارحیت کی سخت ترین الفاظ میں مذمت کی ہے اور اسے بین الاقوامی قانون، اقوام متحدہ کے چارٹر اور عالمی اصولوں کی کھلی خلاف ورزی قرار دیا ہے۔
تنظیم کے مطابق یہ حملہ ایک خطرناک اضافہ ہے جو خطے کے امن و استحکام اور عالمی سلامتی کو متاثر کرتا ہے اور قطر کی خودمختاری، سلامتی اور علاقائی سالمیت پر صریح حملہ ہے۔
او آئی سی کے سیکرٹری جنرل نے اپنے چارٹر، اسلامی سربراہی اجلاس کی قراردادوں اور وزرائے خارجہ کونسل کے فیصلوں کی روشنی میں واضح کیا کہ تنظیم کسی بھی رکن ملک کی خودمختاری اور سلامتی پر حملے کو قطعی طور پر مسترد کرتی ہے۔
او آئی سی نے قطر کے ساتھ مکمل یکجہتی کا اظہار کرتے ہوئے اس کی سلامتی، استحکام، علاقائی سالمیت اور شہریوں کے تحفظ کی حمایت کی اور کہا کہ قطر اپنی حفاظت کے لیے جو اقدامات کرے گا، تنظیم ان کی تائید کرے گی۔
مزید برآں، او آئی سی نے عالمی برادری خصوصاً سلامتی کونسل سے مطالبہ کیا کہ وہ اپنی ذمہ داری پوری کرے، اسرائیل کو جارحیت سے روکے اور اسے بین الاقوامی قوانین و قراردادوں کی پابندی پر مجبور کرے۔
