غزہ سے سامنے آنے والی ایک نئی ویڈیو میں ایک اسرائیلی یرغمالی نے اپنی ہی حکومت پر سنگین الزامات لگاتے ہوئے کہا ہے کہ حکومت نے قیدیوں کو بے سہارا چھوڑ دیا ہے اور سیاسی مفادات کے لیے جنگ کو طول دے رہی ہے۔
القصام بریگیڈز، جو حماس کا عسکری ونگ ہے، نے جمعہ کے روز ایک ویڈیو جاری کی جس میں غزہ میں قید دو اسرائیلی یرغمالیوں کو دکھایا گیا۔ یہ ویڈیو تنظیم کے ٹیلیگرام چینل پر جاری کی گئی جس کا عنوان تھا "وقت ختم ہو رہا ہے!”
نیتنیاہو حکومت پر سخت تنقید
ویڈیو میں اسرائیلی یرغمالی گائے گل بوع-ڈالال نے براہِ راست اور جذباتی اپیل کرتے ہوئے اسرائیلی حکومت اور آبادکار برادریوں سے مطالبہ کیا کہ غزہ پر جاری حملے فوراً بند کیے جائیں۔ انہوں نے خبردار کیا کہ اگر جارحیت جاری رہی تو قیدیوں سمیت وہ خود بھی مارے جا سکتے ہیں۔
28 اگست 2025 کو ریکارڈ کی گئی اس ویڈیو میں ڈالال کو غزہ شہر کی تباہ شدہ سڑکوں پر ایک گاڑی میں سفر کرتے اور ایک دوسرے یرغمالی سے بات کرتے ہوئے دکھایا گیا ہے۔
"یہ سب کچھ حکومت کی وجہ سے ہے”
ویڈیو کے طویل حصے میں ڈالال نے کہا کہ انہیں یقین نہیں آتا کہ وہ 22 ماہ کی اسیر ی کے بعد اب تک زندہ ہیں۔ انہوں نے غزہ کی خوفناک صورتحال بیان کرتے ہوئے کہا:
"ہم یہاں غزہ میں جدوجہد کر رہے ہیں۔ نہ کھانا ہے، نہ گیس، نہ پانی، نہ بجلی۔ میں، باقی یرغمالی، اور غزہ پٹی کے بیس لاکھ رہائشی سب اسی اذیت میں جی رہے ہیں۔”
انہوں نے اسرائیلی حکومت پر قیدیوں کو نظرانداز کرنے کا الزام لگایا اور طنزیہ انداز میں وزیرِاعظم بنیامین نیتنیاہو کا "شکریہ” ادا کیا:
"شکریہ، وزیرِاعظم نیتنیاہو، کہ آپ نے آخرکار ہمیں کچھ روٹی، پنیر اور انڈومی نوڈلز دیے۔ شکریہ کہ آپ نے ہمیں زندہ رہنے کے لیے تھوڑی توانائی دی، جبکہ آپ کا بیٹا میامی میں باربی کیو کر رہا ہے۔”
"حملہ ہوا تو ہم مارے جائیں گے”
ڈالال نے کہا کہ القصام بریگیڈز کے جنگجوؤں نے واضح کر دیا ہے کہ اگر غزہ شہر پر حملہ ہوا تو یرغمالیوں کو کہیں منتقل نہیں کیا جائے گا، جس کا مطلب ہے کہ وہ براہِ راست خطرے میں ہیں۔
"ہم غزہ شہر سے باہر نہیں جائیں گے۔ القصام نے ہمیں یہی بتایا ہے… اس کا مطلب ہے کہ یرغمالی مارے جائیں گے۔”
انہوں نے کہا کہ ان کے ساتھ آٹھ سے زیادہ یرغمالی موجود ہیں اور صورتحال کسی بڑے المیے کے دہانے پر ہے۔
اسرائیلی عوام سے احتجاج کی اپیل
ڈالال نے اپنے پیغام میں کہا کہ ان کی زندگی بچانے کا یہ "آخری موقع” ہے۔ انہوں نے اسرائیلی آبادکاروں سے کہا کہ وہ حکومت کے خلاف احتجاج کریں اور دباؤ ڈالیں:
"زیادہ سے زیادہ تعداد میں احتجاج کریں۔ سخت احتجاج کریں۔ براہِ کرم اس پاگل پن کو روکو۔ اس جنگ کو روکو۔ میں تم سے التجا کرتا ہوں… سڑکوں پر نکلو۔ حکومت کے لیے مشکلات پیدا کرو، کیونکہ یہ حکومت ہمیں یہاں مرنے دینا چاہتی ہے۔”
انہوں نے سابق یرغمالیوں سے بھی اپیل کی کہ وہ خاموش نہ رہیں:
"عومر اور تال، تم میرے ساتھ یہاں تھے، اور ایویاتار کے ساتھ بھی۔ براہِ کرم ہمارے لیے آواز اٹھاؤ۔ سڑکوں پر نکلو، بلیک میل نہ مانو، حکومت کے خلاف کھڑے ہو جاؤ۔”
"ہم نیتنیاہو کے قیدی ہیں، حماس کے نہیں”
ویڈیو کے آخر میں ڈالال نے واضح کیا کہ اصل رکاوٹ اسرائیلی حکومت ہے، نہ کہ حماس:
"ہم نیتنیاہو، بن گویر اور سموتریچ کے قیدی ہیں، جو مسلسل جھوٹ بول رہے ہیں اور ہمیں گھر واپس نہیں آنے دینا چاہتے۔”
اس نے غزہ شہر کی موجودہ صورتحال کو ہولناک قرار دیا، جہاں ہر طرف تباہی، بمباری اور خوف کا عالم ہے:
"میں ابھی غزہ شہر میں ہوں، اور دھماکے لگاتار جاری ہیں۔ جنگی طیارے اوپر اڑ رہے ہیں۔ ہم چاہتے ہیں کہ یہ سب ختم ہو، ہم واپس اپنے خاندانوں کے پاس جانا چاہتے ہیں۔”
ڈالال نے بتایا کہ وہ فرنٹ لائنز کے قریب ہیں اور ہر لمحہ خطرہ ہے:
"ہم فوج کے قریب ہیں۔ ہم خوفزدہ ہیں۔ یہاں دھماکے ہو رہے ہیں، فائرنگ ہو رہی ہے۔ براہِ کرم ہمیں واپس لے جاؤ۔”
اندرونی دباؤ اور بڑھتا ہوا بحران
یہ ویڈیو نہ صرف غزہ میں بگڑتی ہوئی انسانی صورتحال کو اجاگر کرتی ہے بلکہ اسرائیلی حکومت کے اندر بڑھتی ہوئی تقسیم اور عوامی بےچینی کو بھی نمایاں کرتی ہے۔ یرغمالی ڈالال کا پیغام اس حقیقت کی عکاسی کرتا ہے کہ اسرائیلی وزیرِاعظم نیتنیاہو پر "لا متناہی جنگ” کے ذریعے اقتدار بچانے کا الزام تیزی سے زور پکڑ رہا ہے، چاہے اس کی قیمت شہریوں اور قیدیوں کی جانوں پر ہی کیوں نہ ہو۔
