تل ابیب (مشرق نامہ) – اسرائیلی چینل 13 کی ایک حالیہ رپورٹ نے فوج، موساد اور قیادت پر 7 اکتوبر کے واقعات سے نمٹنے میں سنگین ناکامیوں کا الزام عائد کیا ہے، جبکہ وزیراعظم نیتن یاہو کی جانب سے سرکاری تحقیقات سے انکار پر بھی سوالات اٹھائے ہیں۔
رپورٹ میں کہا گیا ہے کہ اسرائیلی فوج، موساد اور انٹیلی جنس ادارے حملے کے وقت مناسب تیاری نہیں رکھتے تھے۔ چینل 13 کے تجزیہ کار ایال مارکووِچ نے واضح الفاظ میں فوج کی تیاری پر کڑی تنقید کی۔
انہوں نے سوال اٹھایا کہ بنیادی سوال یہ ہے کہ 7 اکتوبر کو فوج کہاں تھی؟ سرحد پر سینکڑوں فوجی تعینات کیوں نہیں تھے؟ یہ بالکل واضح ہے کہ فوج ناکام رہی۔
مارکووِچ کے مطابق یہ ناکامی صرف فوج تک محدود نہیں تھی بلکہ اس میں موساد، انٹیلی جنس ادارے، اعلیٰ فوجی کمانڈرز اور سیاسی قیادت سبھی برابر کے ذمہ دار ہیں۔
تحقیقات سے انکار پر نیتن یاہو پر سوالات
تجزیہ کار نے وزیراعظم نیتن یاہو کے اس رویے پر بھی سوال اٹھایا کہ وہ باضابطہ ریاستی تحقیقات کے مخالف کیوں ہیں۔
مارکووِچ نے کہا کہ
اگر سب کچھ شفاف ہے تو نیتن یاہو باضابطہ تحقیقات سے کیوں خوفزدہ ہیں؟
انہوں نے زور دیا کہ حکومت کے اعلیٰ ترین سطح پر جوابدہی کا نہ ہونا سنگین تشویش کا باعث ہے، خاص طور پر ایسے وقت میں جب سکیورٹی اور انٹیلی جنس کے پورے نظام میں ناکامی کے واضح شواہد موجود ہیں۔
مارکووِچ نے اشارہ دیا کہ وزیراعظم خود بھی، براہِ راست یا بالواسطہ، ان ناکامیوں میں کردار ادا کر سکتے ہیں۔
سرکاری تحقیق سے فرار، نجی کمیٹی کا منصوبہ
رپورٹ کے مطابق نومبر 2024 میں اسرائیلی فوج کے سینئر عہدیداروں نے اعتراف کیا تھا کہ 7 اکتوبر 2023 کے واقعات کی تحقیقات کے نتائج پیش کرنے میں طویل تاخیر کی گئی ہے۔ ان کا کہنا تھا کہ اگرچہ کئی تحقیقات مکمل ہوچکی ہیں اور زیریں سطح کے حکام کو بھیجی جاچکی ہیں، لیکن انہیں سابق چیف آف اسٹاف کے سامنے پیش کرنے میں رکاوٹیں ڈالی جا رہی ہیں۔
اسی دوران، اسرائیلی اخبار اسرائیل ہیوم کے مطابق، وزیراعظم نیتن یاہو ایک "نجی تحقیقاتی کمیٹی” تشکیل دینے کے لیے سرگرم تھے تاکہ سرکاری ریاستی کمیشن آف انکوائری کی تشکیل کو روکا جا سکے۔
ذرائع کے مطابق، مجوزہ کمیٹی میں ایک جج، فوج کے نمائندے اور 7 اکتوبر کو ہلاک یا یرغمال بننے والے افراد کے اہل خانہ کے نمائندے شامل کیے جانے تھے۔ بتایا گیا کہ اس کمیٹی کے اراکین کا انتخاب حکومتی اتحاد اور اپوزیشن کے درمیان اتفاقِ رائے سے ہونا تھا، کیونکہ حکومت اور عدلیہ کے درمیان شدید عدم اعتماد پایا جاتا ہے۔
یہ انکشافات اسرائیلی معاشرے کے اندر بڑھتے ہوئے دباؤ کی عکاسی کرتے ہیں، جہاں اندرونی آوازیں شفافیت، جوابدہی اور 7 اکتوبر کے سانحے کے حقائق سامنے لانے کے لیے مسلسل زور دے رہی ہیں۔
