اطالوی فٹبال کوچز کا اسرائیل کے ورلڈ کپ میچز معطل کرنیکا مطالبہ

ا

روم(مشرق نامہ) – اطالوی فٹبال کوچز ایسوسی ایشن (AIAC) نے عالمی اداروں سے مطالبہ کیا ہے کہ غزہ پر جاری جنگ کے باعث اسرائیل کو بین الاقوامی مقابلوں سے معطل کیا جائے۔

اطالوی قومی ٹیم آئندہ دو ماہ میں اسرائیل کے خلاف دو اہم ورلڈ کپ کوالیفائنگ میچز کھیلنے والی ہے، تاہم کوچز ایسوسی ایشن کا مؤقف ہے کہ اسرائیل کو رکنا ہوگا، فٹبال کو بھی اقدام کرنا ہوگا۔

AIAC نے اطالوی فٹبال فیڈریشن کو ایک باضابطہ خط لکھا ہے جسے یورپی فٹبال فیڈریشن (یوفا) اور عالمی فٹبال کے ادارے (فیفا) کو بھیجا جائے گا۔ اس خط میں اسرائیل کو وقتی طور پر کھیلوں سے خارج کرنے کا مطالبہ کیا گیا ہے۔

خط میں کہا گیا ہے کہ AIAC کے بورڈ آف ڈائریکٹرز متفقہ طور پر سمجھتے ہیں کہ روزانہ ہونے والے قتل عام، جن میں مینیجرز، کوچز اور کھلاڑیوں سمیت سیکڑوں افراد ہلاک ہو چکے ہیں، کے پیش نظر اسرائیل کو کھیلوں کے مقابلوں سے وقتی طور پر باہر کرنے کا مطالبہ جائز، ضروری بلکہ ہمارا فرض ہے۔

خط کے اختتام پر کہا گیا کہ ماضی کا درد کسی کے ضمیر اور انسانیت پر پردہ نہیں ڈال سکتا۔

اطالوی ٹیم 8 ستمبر کو ہنگری کے شہر ڈیبریسن میں اسرائیل کے خلاف پہلا میچ نیوٹرل مقام پر کھیلے گی جبکہ دوسرا میچ 14 اکتوبر کو اُدینے میں ہوگا۔

AIAC کے نائب صدر جیان کارلو کامولیسی کا کہنا تھا کہ ہم کھیل پر ہی توجہ مرکوز رکھ سکتے تھے اور دوسری طرف دیکھنے کا انتخاب کر سکتے تھے، لیکن ہمارا ماننا ہے کہ یہ درست نہیں۔

گزشتہ اکتوبر اطالوی ٹیم نے نیشنز لیگ کے ایک میچ میں اُدینے میں اسرائیل کا سامنا کیا تھا، جس کے دوران میچ سے پہلے اور دوران مظاہرے ہوئے تھے اور اسٹیڈیم کی چھت پر سنائپرز تعینات کیے گئے تھے۔

حالیہ مہینوں میں صورتِ حال مزید خراب ہو چکی ہے اور 22 ماہ سے جاری جنگ میں فلسطینی ہلاکتوں کی تعداد 62 ہزار سے تجاوز کر گئی ہے۔

AIAC کے ایک اور نائب صدر فرانچیسکو پیروندی کا کہنا تھا کہ دنیا شعلوں میں گھری ہوئی ہے۔ بہت سے لوگ، جیسے فلسطینی، اذیت میں ہیں۔ بے حسی ناقابلِ قبول ہے۔

دوسری جانب جرمن جریدے بلڈ نے حال ہی میں رپورٹ کیا تھا کہ بُنڈس لیگا 2 کی فٹبال ٹیم فورٹونا ڈسلڈورف نے اسرائیلی فارورڈ شون وائسمین سے معاہدہ شائقین کے غزہ جنگ پر ان کے سوشل میڈیا بیانات پر احتجاج کے بعد منسوخ کر دیا۔