اسلام آباد (مشرق نامہ) – بیجنگ میں پاکستان اور چین کے مابین اسلحہ کنٹرول، عدم پھیلاؤ اور تخفیف اسلحہ پر دسویں دوطرفہ مشاورتی اجلاس منعقد ہوا، جس میں دونوں ممالک نے عالمی و علاقائی امن و سلامتی سے متعلق امور پر تفصیلی تبادلہ خیال کیا۔
ترجمان دفتر خارجہ کے مطابق، پاکستان کی وزارتِ خارجہ کے آرمز کنٹرول، ڈس آرمامنٹ اور انٹرنیشنل سیکیورٹی ڈویژن کے ایڈیشنل سیکریٹری طاہر اندرابی اور چین کی وزارتِ خارجہ کے ڈائریکٹر جنرل برائے آرمز کنٹرول سن شیاؤبو نے اپنی اپنی وفود کی قیادت کی۔
دونوں ممالک نے جنوبی ایشیا کی صورتِ حال کا جائزہ لیا اور خطے میں سلامتی اور اسٹریٹجک استحکام سے متعلق چیلنجز پر خصوصی توجہ دی۔
اجلاس میں تخفیف اسلحہ اور عدم پھیلاؤ سے متعلق وسیع موضوعات پر گفتگو کی گئی، جس میں اقوامِ متحدہ کی جنرل اسمبلی کی پہلی کمیٹی، کانفرنس آن ڈس آرمامنٹ، اور اہم بین الاقوامی معاہدے جیسے بائیولوجیکل اینڈ ٹاکسن ویپنز کنونشن (BTWC) اور کیمیکل ویپنز کنونشن (CWC) بھی شامل تھے۔
ابھرتی ہوئی ٹیکنالوجیز اور مصنوعی ذہانت کے سکیورٹی پر اثرات کا بھی تفصیلی جائزہ لیا گیا۔ اس کے علاوہ پرامن مقاصد کے لیے جوہری ٹیکنالوجی اور خلا کے استعمال میں دوطرفہ تعاون پر بھی تبادلہ خیال کیا گیا۔
اپنے دورہ بیجنگ کے دوران، سفیر طاہر اندرابی نے چائنا آرمز کنٹرول اینڈ ڈس آرمامنٹ ایسوسی ایشن (CACDA) کے زیراہتمام ایک انٹرایکٹو راؤنڈ ٹیبل میں بھی شرکت کی، جس میں سابق سفارتکاروں، ماہرین، تعلیمی شخصیات اور تھنک ٹینک کے نمائندوں نے شرکت کی۔
پاکستان-چین ڈائیلاگ برائے اسلحہ کنٹرول، عدم پھیلاؤ اور تخفیف اسلحہ دونوں ممالک کے درمیان اسٹریٹجک شراکت داری کا ایک اہم جزو ہے۔ پاکستان اس پلیٹ فارم کو سلامتی، استحکام، اسلحہ کنٹرول اور عدم پھیلاؤ سے متعلق بامعنی مشاورت کے لیے نہایت اہم سمجھتا ہے۔
اگلا مشاورتی اجلاس 2026 میں اسلام آباد میں منعقد ہوگا۔
