نیویارک (مشرق نامہ) – پاکستان اور مغربی بحرالکاہل میں واقع جزیرہ ریاست ’’وفاقی ریاستِ مائکرونیشیا‘‘ کے درمیان جمعرات کو نیویارک میں ایک تقریب کے دوران باضابطہ طور پر سفارتی تعلقات قائم ہو گئے۔
پاکستان کے مستقل نمائندہ برائے اقوام متحدہ سفیر عاصم افتخار احمد اور مائکرونیشیا کے مستقل نمائندہ سفیر جیم ایس لپوے نے دونوں ممالک کے درمیان تعلقات کی باضابطہ تشکیل کے لیے مشترکہ اعلامیہ پر دستخط کیے۔
یہ دستخطی تقریب پاکستان مشن برائے اقوام متحدہ میں منعقد ہوئی جس میں دونوں ممالک کے سفارتکاروں نے شرکت کی، جن میں پاکستان کے نائب مستقل نمائندہ سفیر عثمان جادون بھی شامل تھے۔
اس موقع پر اظہار خیال کرتے ہوئے سفیر عاصم افتخار احمد نے کہا کہ انہیں اس امر پر بے حد مسرت ہے کہ پاکستان اور مائکرونیشیا کے درمیان سفارتی تعلقات پاکستان کے یومِ آزادی کی سالگرہ کے موقع پر قائم ہو رہے ہیں۔
انہوں نے کہا کہ یہ تعلقات انسانی وسائل کے انتظام، استعداد کار میں اضافے اور ماحولیاتی تبدیلی جیسے شعبوں میں تعاون کے نئے مواقع فراہم کریں گے۔ ان کا کہنا تھا کہ دونوں ممالک کے مشن اہم معاملات پر قریبی رابطے میں رہیں گے، خصوصاً اقوام متحدہ میں بین الاقوامی امن و سلامتی کے فروغ کے سلسلے میں۔
سفیر عاصم افتخار احمد نے اس امر پر بھی خوشی کا اظہار کیا کہ پاکستان وہ 100واں ملک ہے جس کے ساتھ مائکرونیشیا نے سفارتی تعلقات قائم کیے ہیں۔
اپنے کلمات میں سفیر لپوے نے دوطرفہ تعلقات کے ایک نئے باب کے آغاز پر مسرت کا اظہار کیا۔ انہوں نے کہا کہ انہیں اس امر پر فخر ہے کہ وہ اپنے ملک کی نمائندگی پاکستان کے ساتھ دوستی اور شراکت کے اس نئے سفر کے آغاز پر کر رہے ہیں۔
انہوں نے مائکرونیشیا میں اقوام متحدہ کے دفاتر کے قیام کے لیے تعاون پر پاکستان کا شکریہ ادا کیا اور اس توقع کا اظہار کیا کہ وہ اپنے پاکستانی ہم منصب کے ساتھ قریبی روابط قائم کر کے دوستی کے رشتے کو مزید مستحکم کریں گے۔
انہوں نے پاکستان کو یومِ آزادی کی مبارکباد بھی پیش کی۔
تقریب سے قبل دونوں سفیروں کے درمیان مختصر ملاقات بھی ہوئی جس میں دوطرفہ اور اقوام متحدہ کے پلیٹ فارم پر ممکنہ شعبہ جاتِ تعاون پر تبادلۂ خیال کیا گیا۔
