اسلام آباد (مشرق نامہ) – وفاقی حکومت نے جولائی 2025 کے بعد ریٹائر ہونے والے ملازمین کے لیے ریلیف کی منظوری دے دی ہے، جس کے نتیجے میں تمام وفاقی پنشنرز کے لیے مساوی بنیاد پر پنشن میں اضافہ کیا جائے گا۔
وزارتِ خزانہ کی جانب سے جاری کردہ ایک یادداشت میں پنشن میں اضافے اور ادائیگی کے طریقہ کار کی تفصیلات بیان کی گئی ہیں۔ یادداشت میں واضح کیا گیا ہے کہ تمام وفاقی پنشنرز کو یکساں بنیاد پر پنشن میں اضافہ ملے گا۔
یادداشت کے مطابق یہ ریلیف 2011 سے 2024 کے دوران دیے گئے پانچ ایڈہاک ریلیف الاؤنسز کو پنشن میں ضم کرنے پر مشتمل ہے۔ ان الاؤنسز کا مجموعی فیصد 70 بنتا ہے۔
مزید وضاحت کی گئی ہے کہ سرکاری ملازمین کی بنیادی پنشن کو ان کی نیٹ پنشن تصور کیا جائے گا۔
وزارتِ خزانہ نے بتایا کہ مجموعی پنشن (Gross Pension) میں سے کمیوٹڈ پنشن منہا کرنے کے بعد ان پانچ ایڈہاک ریلیفز کو شامل کیا جائے گا۔ یہ پانچ الاؤنسز بالترتیب 2011 میں 15 فیصد، 2015 میں 7.5 فیصد، 2022 میں 15 فیصد، 2023 میں 17.5 فیصد، اور 2024 میں 15 فیصد کے اضافے پر مشتمل ہیں۔
