تہران (مشرق نامہ) – پاسدارانِ انقلاب اسلامی (IRGC) نے ایک بیان میں کہا ہے کہ وہ ہر قسم کے خطرات کا منہ توڑ جواب دینے کے لیے مکمل طور پر تیار ہے اور ایران کی خودمختاری و سلامتی کے تحفظ کے لیے پُرعزم ہے۔
یہ بیان اُن کمانڈروں کی شہادت کے چالیسویں دن پر جاری کیا گیا ہے جو 12 روزہ امریکی-اسرائیلی جارحیت کے دوران شہید ہوئے۔ بیان میں خبردار کیا گیا کہ اگر دشمن کی جانب سے دوبارہ کوئی جارحیت کی گئی تو اسے ایسے شدید اور ناقابلِ تصور ردعمل کا سامنا کرنا پڑے گا، جو آپریشن ٹرو پرامس III میں دیے گئے سبق سے کہیں زیادہ سخت ہوگا۔
پاسداران نے اعلان کیا:ایران کی مسلح افواج کی دیگر شاخوں کے ساتھ ہم ہر وقت اور ہر مقام پر امریکہ، صہیونی ریاست یا ان کے اتحادیوں کی کسی بھی جارحیت یا خطرے کا فیصلہ کن اور پشیمان کن جواب دینے کے لیے تیار ہیں۔
بیان میں مزید کہا گیا کہ آج دنیا اس حقیقت کی گواہ ہے کہ ایران، امریکی و صہیونی مظالم کے خلاف، اپنے آزادی پسند مقاصد کے حصول میں ثابت قدم ہے۔
ایران کو دنیا بھر میں امریکہ اور صہیونی ریاست کی وحشیانہ جارحیت کی مذمت میں غیرمعمولی حمایت حاصل ہے، جو اس امر کا ثبوت ہے کہ کوئی بھی مجرمانہ اقدام ایرانی قوم کی فولادی قوتِ ارادی کو توڑ نہیں سکتا۔
ایرانی قوم کے استقلال و آزادی کے عزم کو اجاگر کرتے ہوئے کہا گیا:
"ایرانی قوم کبھی بھی اپنے دشمنوں کے دباؤ یا دھمکیوں کے سامنے سر نہیں جھکائے گی۔”
بیان میں دعویٰ کیا گیا کہ ایران نے امریکہ اور اسرائیل پر جنگ بندی مسلط کی۔
"قوت و جرات کے ساتھ ایران اس تاریخی معرکے سے فاتح اور سربلند نکلا، جس نے نہ صرف قومی وقار میں اضافہ کیا بلکہ آئندہ خطرات سے نمٹنے کا راستہ بھی ہموار کیا۔”
بیان کے اختتام پر کہا گیا:
"آج، ہمارے شہداء کے پاکیزہ لہو کی بدولت، ایران ایک ناقابلِ انکار عالمی طاقت بن چکا ہے، جو کسی بھی خطرے کو موقع میں بدلنے اور اپنے دشمنوں کی حتمی شکست کی جانب بڑھنے کے لیے تیار ہے۔”
پاسدارانِ انقلاب نے "آپریشن ٹرو پرامس III” اور "ہیَرالڈ آف وکٹری” کے دوران ایرانی مسلح افواج کی کامیاب کارکردگی کی تعریف کی اور کہا کہ انہی حکمتِ عملی، قوت اور عزم کی بدولت ایران نے امریکہ اور اسرائیل کو جنگ بندی پر مجبور کیا۔
