بیجنگ (مشرق نامہ) – چین نے بدھ کے روز ایک دوٹوک بیان میں امریکہ کے ان مطالبات کو مسترد کر دیا جن میں بیجنگ سے ایران اور روس سے تیل کی درآمد بند کرنے کا کہا گیا تھا۔ وزارتِ خارجہ چین نے ایکس (سابقہ ٹوئٹر) پر جاری بیان میں کہا کہ
چین ہمیشہ اپنی قومی مفادات کو مدنظر رکھتے ہوئے توانائی کی فراہمی کو یقینی بنائے گا۔
بیان میں مزید کہا گیا کہ ٹیرف کی جنگوں میں کوئی فاتح نہیں ہوتا۔ دباؤ اور زبردستی سے کچھ حاصل نہیں ہوگا۔ چین اپنی خودمختاری، سلامتی اور ترقیاتی مفادات کا پُرزور دفاع کرے گا۔
یہ ردِعمل اس وقت سامنے آیا جب اسٹاک ہوم میں ہونے والے اعلیٰ سطحی تجارتی مذاکرات میں امریکی حکام نے چین سے ایران اور روس سے تیل کی خریداری روکنے کا مطالبہ کیا۔ امریکی وزیرِ خزانہ اسکاٹ بیسنٹ نے، اگرچہ چین کی سخت موقف کو "سیاسی حقیقت” کے طور پر تسلیم کیا، تاہم کہا کہ چینی "اپنی خودمختاری کو نہایت سنجیدگی سے لیتے ہیں” اور ترجیحاً ٹیرف ادا کر لیں گے مگر امریکی شرائط کو قبول نہیں کریں گے۔
بیسنٹ نے مذاکرات کو "مشکل” قرار دیا، تاہم دعویٰ کیا کہ مجموعی تجارتی معاملات پر پیشرفت ہوئی ہے—تاہم چین کے واضح انکار نے اس امریکی دعوے کو چیلنج کر دیا۔
چین کی طرح بھارت نے بھی امریکی دباؤ کو مسترد کرتے ہوئے روس سے تیل کی درآمد جاری رکھنے کا اعلان کیا ہے۔ اعلیٰ بھارتی حکام نے تصدیق کی کہ "پالیسی میں کوئی تبدیلی نہیں کی گئی”—جو اس بات کی علامت ہے کہ عالمی نظام تیزی سے کثیر قطبی (multipolar) رخ اختیار کر رہا ہے اور واشنگٹن کی گرفت کمزور پڑ رہی ہے۔
چین اس وقت ایران کی تیل برآمدات کا اندازاً 90 فیصد خریدار ہے، اور دونوں ممالک کے درمیان 25 سالہ جامع اسٹریٹجک شراکت داری اس تعلق کو باضابطہ بناتی ہے۔
اس کے ساتھ ساتھ، ایران کی 2023 میں BRICS اور شنگھائی تعاون تنظیم (SCO) میں شمولیت—جو چین اور روس کی حمایت سے ممکن ہوئی—نے تہران کو مغربی دباؤ کے خلاف ادارہ جاتی تحفظ فراہم کیا ہے۔ ایران اب ڈالر سے ہٹ کر متبادل ادائیگی اور تجارتی نظام تشکیل دینے کی کوششوں میں شریک ہے۔
امریکہ کی "زیادہ سے زیادہ دباؤ” (maximum pressure) کی پالیسی ایران کی تیل برآمدات کو "مفلوج” کرنے میں بری طرح ناکام رہی ہے۔ توانائی سے متعلق تجزیاتی ادارے Vortexa اور Kpler کے مطابق، ایران مسلسل روزانہ 15 لاکھ بیرل سے زائد تیل برآمد کر رہا ہے، جب کہ جون 2025 میں یہ برآمدات 17 لاکھ بیرل یومیہ تک پہنچ گئیں—جس سے ماہانہ آمدنی کا تخمینہ تقریباً 3.7 ارب ڈالر لگایا گیا ہے۔
یہ اعداد و شمار محتاط اندازے ہیں، کیونکہ ایران سرکاری سطح پر برآمدات کی تفصیلات شاذ و نادر ہی جاری کرتا ہے۔
تجزیہ کاروں کا ماننا ہے کہ واشنگٹن کی پابندیاں الٹا اسٹریٹجک نقصان کا باعث بن رہی ہیں۔ ان اقدامات نے ایران کو ایک مزاحمتی معیشت کی تشکیل پر مجبور کیا، جس سے دفاع سے لے کر زراعت تک کئی داخلی صنعتوں میں ترقی ہوئی۔
ایران نے چین، روس، شنگھائی تعاون تنظیم کے دیگر ارکان، اور اپنے ہمسایہ ممالک کے ساتھ تجارتی شراکتیں قائم کر کے اپنی مارکیٹوں کو متنوع بنانے اور مغرب پر انحصار کم کرنے کی پالیسی اختیار کی ہے۔
