مانیٹرنگ ڈیسک (مشرق نامہ)وفاقی وزارت بحری امور نے پیر کے روز پہلی مرتبہ ایک بین الاقوامی فیری آپریٹر کو لائسنس جاری کیا ہے، جو پاکستان کو ایران اور خلیجی تعاون کونسل (GCC) کے ممالک سے جوڑنے والی سمندری راہوں پر خدمات فراہم کرے گا۔
گزشتہ ماہ وزارت نے گوادر بندرگاہ کی استعداد کار بڑھانے اور پاکستان کو خلیجی ممالک سے جوڑنے والی فیری سروس شروع کرنے کا منصوبہ پیش کیا تھا۔
یہ منظوری ایک اعلیٰ سطحی لائسنسنگ کمیٹی کے اجلاس کے بعد دی گئی، جس میں وزارتِ بحری امور، دفاع، خارجہ، داخلہ، پاکستان نیشنل شپنگ کارپوریشن اور بندرگاہ و شپنگ حکام کے نمائندے شامل تھے۔
وفاقی وزیر برائے بحری امور جنید انور چوہدری نے اس اقدام کو وزیر اعظم شہباز شریف کے وژن اور قومی بحری پالیسی کے مطابق تاریخی پیش رفت قرار دیا۔
انہوں نے کہا:یہ لائسنس خطے میں رابطوں، مذہبی سیاحت اور اقتصادی سرگرمیوں کو فروغ دینے کا موقع فراہم کرتا ہے۔
یہ فیری سروس سالانہ لاکھوں افراد کو فائدہ پہنچانے کی توقع ہے، خصوصاً ان زائرین کو جو ایران و عراق جاتے ہیں، نیز وہ افراد جو GCC ممالک میں کام یا سیاحت کی غرض سے سفر کرتے ہیں۔
وزیر نے مزید کہا کہ:یہ سروس زمینی راستوں پر دباؤ کم کرے گی اور ہوائی سفر کے مقابلے میں کم خرچ متبادل فراہم کرے گی۔
ابتدائی طور پر کراچی اور گوادر بندرگاہوں سے جدید سہولیات سے آراستہ فیریوں کے ذریعے آپریشن شروع ہوگا، اور مستقبل میں طلب اور دوطرفہ معاہدوں کی بنیاد پر راستے اور بندرگاہوں کی تعداد میں اضافہ کیا جائے گا۔
یہ سروس پاکستان کی بلیو اکانومی کی ترقی، تجارتی لاجسٹکس کی بہتری، اور سمندری سیاحت کو فروغ دینے کی وسیع تر حکمت عملی کا حصہ ہے۔
یاد رہے، گزشتہ ہفتے حکومت کی جانب سے اربعین کے دوران ایران کے لیے زمینی سفر پر پابندی کے فیصلے پر مذاکراتی تعطل کے تناظر میں، وزارت بحری امور زائرین کے لیے فیری سروس کا متبادل تجویز کر رہی تھی۔
گزشتہ ماہ پانچ نجی کمپنیوں نے گوادر سے خلیجی ممالک کے لیے فیری روٹس کی تجاویز وزارت کو جمع کرائیں تھیں۔
