اسلام آباد (مشرق نامہ) – وزیر اعظم شہباز شریف نے پیر کے روز پولیس فورس کو خراجِ تحسین پیش کرتے ہوئے کہا کہ اس نے ملک کے اندرونی سلامتی کو عدم استحکام سے بچانے کے لیے انسدادِ دہشت گردی کی متعدد کارروائیوں میں قائدانہ کردار ادا کیا۔
یومِ شہداء پولیس کے موقع پر اپنے پیغام میں وزیر اعظم نے کہا کہ آج ہم اپنی پولیس کے ان بہادر افسران اور جوانوں کو خراجِ عقیدت پیش کرتے ہیں جو موسم کی سختیوں کی پرواہ کیے بغیر اپنی ڈیوٹی انجام دیتے ہیں، اپنے پیاروں سے دور رہ کر قانون کی عملداری کے لیے جانوں کا نذرانہ پیش کرتے ہیں۔
انہوں نے کہا کہ آج ہم ان عظیم خاندانوں کو بھی سلام پیش کرتے ہیں جنہوں نے ہمارے مستقبل کے لیے اپنے پیاروں کی قربانی دی۔
وزیر اعظم نے کہا کہ دہشت گردی کے خلاف جنگ میں 8 ہزار سے زائد پولیس افسران اور اہلکاروں نے وطنِ عزیز کے لیے اپنا خون بہایا اور ایک فرنٹ لائن دفاعی فورس کے طور پر لاکھوں بچوں کو یتیم ہونے سے بچایا، جبکہ خود ان کے اپنے بچے یتیم ہو گئے۔
انہوں نے مزید کہا کہ حال ہی میں رحیم یار خان میں ڈاکوؤں کے خلاف آپریشن کے دوران ایلیٹ فورس کے پانچ جوان شہید ہوئے۔
وزیر اعظم نے کہا کہ یہ شہداء اور دیگر ہزاروں پولیس اہلکار ہمارے لیے باعثِ فخر ہیں ۔
انہوں نے کہا کہ پاکستان پولیس نے دنیا بھر میں اپنی پیشہ ورانہ صلاحیتوں کا لوہا منوایا ہے، اور حالیہ ورلڈ پولیس سمٹ 2025 میں حاصل کیے گئے تمغے اور اعزازات اس کا منہ بولتا ثبوت ہیں۔
وزیر اعظم نے کہا کہ امن و امان کے قیام اور جرائم کی مؤثر روک تھام کے لیے پولیس کی جانب سے جدید ٹیکنالوجی کا استعمال نہایت خوش آئند ہے، جس سے شہریوں کا تحفظ مزید بہتر اور مؤثر ہو گا۔
انہوں نے مزید کہا کہ چاروں صوبوں میں انسدادِ دہشت گردی فورسز کے قیام، پاک فوج اور رینجرز کے ساتھ مشترکہ آپریشنز اور قدرتی آفات و ہنگامی صورتحال میں پولیس کا کردار نہایت اہم رہا، جس کے باعث عوام کا پولیس پر اعتماد بڑھا ہے اور اس کی کارکردگی میں نمایاں بہتری آئی ہے۔
وزیر اعظم نے کہا کہ گزشتہ برسوں میں پولیس نے دہشت گردی کے خلاف جنگ میں سینکڑوں آپریشنز کیے اور دشمن کے ملک کو غیر مستحکم کرنے کے عزائم کو ناکام بنایا۔
انہوں نے کہا کہ گوادر کے ساحلوں سے لے کر گلگت بلتستان کے بلند و بالا پہاڑوں تک، ملک کے دفاع پر معمور ہر پولیس افسر میرے اور پوری قوم کے لیے فخر کا باعث ہے۔
