مشرق وسطیٰ (مشرق نامہ) – ایک ممتاز ماہرِ نسل کشی نے اسرائیل حکومت کے مغربی اتحادیوں کو شدید تنقید کا نشانہ بناتے ہوئے کہا ہے کہ وہ تل ابیب کو جوابدہی سے بچانے کے لیے ہر ممکن سفارتی ڈھال فراہم کر رہے ہیں، باوجود اس کے کہ اسرائیل غزہ کو جان بوجھ کر اور منظم طریقے سے غیرقابل رہائش بنانے کی پالیسی پر گامزن ہے۔
یہ بات براؤن یونیورسٹی میں ہولوکاسٹ اور نسل کشی کے مطالعات کے ڈین پروفیسر عومر بارطوف نے یورپین سینٹر فار پاپولزم اسٹڈیز (ECPS) کو دیے گئے ایک تفصیلی انٹرویو میں کہی، جو ہفتے کے روز شائع ہوا۔
پروفیسر بارطوف نے کہا کہ اکتوبر 2023 سے اب تک غزہ میں اسرائیلی افواج کے اقدامات اقوام متحدہ کے نسل کشی کنونشن کے تحت واضح طور پر اُس نیت کی عکاسی کرتے ہیں جس میں "کسی مخصوص گروہ کو مکمل یا جزوی طور پر تباہ کرنا” شامل ہوتا ہے۔
ان کا کہنا تھا کہ زندگی کو ناممکن بنانا اب اسرائیلی پالیسی کا مرکزی ہدف بن چکا ہے، نہ کہ کوئی حادثاتی نتیجہ۔
اسرائیلی بیانات اور نسل کشی کی نیت
بارطوف نے 7 اکتوبر کے بعد اسرائیلی حکام کے اُن بیانات کا حوالہ دیا جن میں فلسطینی علاقوں میں مزاحمتی کارروائیوں کے بعد غزہ کو "مٹی میں ملانے” اور فلسطینیوں کو "انسانی جانور” قرار دینے جیسے الفاظ استعمال کیے گئے۔ ان کے بقول یہ ابتدائی بیانات ہی نسل کشی کی نیت کا ثبوت تھے۔
انہوں نے کہا کہ مئی 2024 تک اسرائیلی افواج کے مقاصد روایتی جنگی اہداف سے ہٹ کر مکمل تباہی کی جانب منتقل ہو چکے تھے، جس کا مقصد غزہ کو ناقابلِ سکونت بنانا تھا۔
انہوں نے مزید کہا کہ اسرائیلی فوج نے جنوبی شہر رفح سے دس لاکھ سے زائد افراد کو زبردستی بے دخل کر کے انہیں غیرقابل رہائش المواسی منتقل کیا، اور اس کے بعد رفح کو تباہ کیا گیا — یہ تمام اقدامات وسیع تر منظم حکمتِ عملی کا حصہ ہیں۔
غزہ میں 300 فیصد اسقاطِ حمل میں اضافہ
"فزیشنز فار ہیومن رائٹس” نامی ایک اسرائیلی انسانی حقوق تنظیم کی رپورٹ کا حوالہ دیتے ہوئے بارطوف نے کہا کہ اسرائیلی حملوں نے غزہ کے صحت، تعلیم اور مذہبی ڈھانچے کو جان بوجھ کر نشانہ بنایا ہے۔
انہوں نے کہا کہ 7 اکتوبر کے بعد سے اسقاطِ حمل (miscarriages) میں 300 فیصد اضافہ ہوا ہے، جو نسل کشی کنونشن کی اُس شق کے زمرے میں آتا ہے جس میں کسی گروہ میں پیدائش کو روکنے کی کوشش کو بھی نسل کشی قرار دیا گیا ہے۔
بارطوف نے مغربی ممالک پر شدید تنقید کرتے ہوئے کہا کہ وہ اسرائیل کو "سفارتی آہنی گنبد” کے ذریعے تحفظ دے رہے ہیں، جس کی قیادت امریکہ اور یورپی اتحادی کر رہے ہیں — اور یہ وہی ممالک ہیں جو خود کو عالمی قوانین کے محافظ قرار دیتے ہیں۔
ان کے بقول٬ یہ غیر معمولی بات ہے کہ وہی ممالک جو خود کو بین الاقوامی قانون کے محافظ کہتے ہیں، وہی ممکنہ نسل کشی کے سہولت کار بنے ہوئے ہیں۔
اسرائیلی حکومت میں بالادست نظریات
اسرائیلی سیاسی منظرنامے پر روشنی ڈالتے ہوئے بارطوف نے کہا کہ وزیراعظم نیتن یاہو کی قیادت میں قائم حکومتی اتحاد اسرائیل کی تاریخ کا سب سے انتہا پسند دایاں بازو کا اتحاد ہے۔
انہوں نے خاص طور پر بیتزالئیل سموترچ اور ایتمار بن گویر جیسے وزرا کا ذکر کیا جن کے نظریات نسلی بالادستی پر مبنی ہیں۔
رفح کو قید گاہ میں بدلنے کا منصوبہ
بارطوف نے اسرائیلی وزیر اسرائیل کاٹز کے اُس منصوبے کا بھی ذکر کیا جس کے مطابق رفح کو ایک "انسانی شہر” میں تبدیل کرنے کی بات کی گئی تھی۔ بارطوف کے مطابق یہ دراصل ایک "ارتکاز کیمپ” (concentration camp) بنانے کی تجویز ہے، نہ کہ کوئی انسانی ہمدردی پر مبنی منصوبہ۔
انہوں نے اسرائیلی میڈیا کو بھی آڑے ہاتھوں لیا اور کہا کہ خود ساختہ سنسرشپ اور تمام غزہ کے شہریوں کو "دہشت گردوں کے معاون” کے طور پر پیش کرنا گمراہ کن بیانیہ ہے۔
امید کی کرن: فلسطینیوں کی عینی شہادتیں
تاہم بارطوف نے کہا کہ وہ فلسطینیوں کی ذاتی شہادتوں میں امید دیکھتے ہیں، کیونکہ یہی بیانات عالمی سطح پر رائے عامہ کو بدلنے میں اہم کردار ادا کر سکتے ہیں۔
اختتام پر بارطوف نے زور دیا کہ صرف اسرائیلی اقدامات کو ہی نہیں، بلکہ عالمی خاموشی کو بھی چیلنج کرنا ناگزیر ہے، کیونکہ یہی خاموشی ایسے مظالم کے لیے راستہ ہموار کرتی ہے۔
