تہران (مشرق نامہ) – ایرانی پاسدارانِ انقلاب کے ترجمان بریگیڈیئر جنرل علی محمد نائینی نے اسرائیلی حکام کی جانب سے ایران پر مزید جارحیت کی دھمکیوں کے بعد سخت وارننگ جاری کرتے ہوئے کہا ہے کہ مستقبل میں ایران کے ردعمل سابقہ کارروائیوں سے کہیں زیادہ تباہ کن ہوں گے۔
انہوں نے بدھ کے روز اپنے بیان میں کہا کہ ایران کے ردعمل ماضی میں دیکھے گئے اقدامات سے زیادہ شدید ہوں گے۔ ہمارے لیے یہ بات بالکل واضح ہے کہ صیہونی حکومت کے رہنماؤں کے حالیہ بیانات ایران کی قومی یکجہتی اور میزائل طاقت کے خوف پر مبنی ہیں۔
انہوں نے اسرائیلی حکام کی جارحانہ زبان پر ردعمل دیتے ہوئے اس بات پر زور دیا کہ اسرائیل ایران کی یکجہتی اور عسکری قوت سے خائف ہے۔
نائینی نے حالیہ 12 روزہ جنگ کا حوالہ دیتے ہوئے کہا کہ اس جنگ میں ایران کے جوابی حملوں نے مقبوضہ فلسطین میں معمولاتِ زندگی مفلوج کر دیے، اور صیہونی حکومت کے دن گنے جا چکے تھے۔
انہوں نے واضح کیا کہ اگر ایران کی سلامتی کو دوبارہ نشانہ بنایا گیا تو دشمن مقبوضہ علاقوں میں ہی گھٹ کر رہ جائے گا۔ نائینی نے اس بات پر بھی روشنی ڈالی کہ وہی اسرائیل جو ایران کے میزائل حملوں سے گھبرا کر ثالثوں کے ذریعے جنگ بندی کی بھیک مانگ رہا تھا، اب پھر سے جارحیت کی دھمکیاں دے رہا ہے۔
انہوں نے خبردار کیا کہ اگر صیہونی حکومت طاقتور ایران پر نیا حملہ کرتی ہے تو یہ ہمارا اختیار ہوگا کہ ہم اس نئی جنگ کو کس انجام تک پہنچاتے ہیں۔
ان کا مزید کہنا تھا کہ مقبوضہ علاقوں میں سائرن مسلسل بجتے رہیں گے، پناہ گاہیں چھوڑنے کا وقت بھی نہیں ملے گا۔ 12 روزہ جنگ کے مقابلے میں زیادہ نقل مکانی اور بھاگ دوڑ ہوگی۔
ایران کبھی جارحیت کے سامنے نہیں جھکے گا: عراقچی
ایرانی وزیر خارجہ عباس عراقچی نے پیر کے روز سخت لہجہ اپناتے ہوئے خبردار کیا کہ اگر ایران کی جوہری تنصیبات پر ایک اور حملہ کیا گیا تو تہران شدید ردعمل دے گا۔
سماجی پلیٹ فارم ایکس (سابقہ ٹوئٹر) پر جاری کردہ بیان میں انہوں نے کہا کہ ایران ایک سات ہزار سالہ تاریخ رکھنے والا ملک ہے۔ ہم نہ پہلے کسی جارح کے سامنے جھکے، نہ اب جھکیں گے۔ ایرانی صرف عزت کا جواب دیتے ہیں، دھمکیوں کا نہیں۔
یہ بیان امریکی صدر ڈونلڈ ٹرمپ کی اس دھمکی کے بعد سامنے آیا جس میں انہوں نے کہا تھا کہ اگر ایران اپنی جوہری تنصیبات کو دوبارہ فعال کرنے کی کوشش کرے تو امریکہ دوبارہ فضائی حملے کرے گا۔
ٹرمپ نے صحافیوں سے گفتگو کرتے ہوئے دعویٰ کیا کہ ہم نے ان کی جوہری صلاحیتوں کو مٹا دیا ہے۔ اگر وہ دوبارہ شروع کرتے ہیں تو ہم اسے اس سے بھی تیزی سے مٹا دیں گے جتنی جلدی آپ انگلی ہلا سکتے ہیں۔
