غزہ کے میڈیا چیف کا یمن کو خراجِ تحسین: "ہم ایک ہی مورچے کے سپاہی ہیں”

غ

صنعا (مشرق نامہ) – غزہ کے سرکاری میڈیا دفتر کے ڈائریکٹر ڈاکٹر اسماعیل الثوابتہ نے یمن کے دارالحکومت صنعا اور دیگر صوبوں میں جمعے کے روز منعقد ہونے والے عظیم الشان ملین مارچ کو خراجِ تحسین پیش کیا ہے، جس کا مقصد غزہ سے یکجہتی اور اسرائیلی مظالم کے خلاف حمایت کا اظہار تھا۔

ہفتے کے روز اپنے ایکس اکاؤنٹ پر ڈاکٹر الثوابتہ نے لکھا کہ محصور غزہ کے دل سے یمن کے بلند و بالا پہاڑوں تک، ہم بے حد فخر سے آپ کی عظیم الشان یکجہتی، غیرت اور عزت کی مثالوں کو سلام پیش کرتے ہیں۔

انہوں نے مزید لکھا کہ اے حکمت و ایمان کے لوگو! آپ صرف ہمارے ساتھ نہیں بلکہ ہمارے اندر موجود ہو… ہمارے ضمیر میں، ہمارے مورچے میں۔ ہمارا خون ایک ہے، ہماری پکار ایک ہے۔ اللہ آپ کو جزائے خیر دے، اے عظیم یمنیو! القدس ہمارا وعدہ ہے، ان شاء اللہ۔

یہ الفاظ ایک ایسے موقع پر سامنے آئے جب شدید بارش کے باوجود یمن کے دارالحکومت صنعا میں لاکھوں افراد نے "غزہ اور فلسطین کے ساتھ استقامت… فریب دہ اور غداری پر مبنی معاہدوں کو مسترد کرتے ہیں” کے نعرے کے تحت سڑکوں پر مارچ کیا۔

یمن کے عوام ہر سمت سے امڈ آئے، بارش کی پروا کیے بغیر انہوں نے غزہ اور فلسطین سے وفاداری کا عہد دہرایا، اور جہاد و شہادت کے راستے پر گامزن رہنے کا عزم کیا، یہاں تک کہ فتحِ کامل حاصل ہو۔

مارچ 2، 2025 سے اسرائیل نے غزہ کی تمام سرحدیں بند کر رکھی ہیں، جس کے نتیجے میں خوراک اور امداد کی فراہمی مکمل طور پر معطل ہے اور قحط کی شدت خطرناک حد تک بڑھ چکی ہے۔

اسرائیلی حکومت گزشتہ 18 برس سے غزہ کا محاصرہ کیے ہوئے ہے، اور رواں برس 2 مارچ کو جب اس نے فلسطینی مزاحمتی گروہ حماس کے ساتھ جنگ بندی کی خلاف ورزی کی، تب سے اس نے تمام سرحدی گزرگاہیں بند کر کے انسانی بحران کو شدید تر بنا دیا۔

7 اکتوبر 2023 سے جاری اسرائیلی نسل کشی میں اب تک 60,332 فلسطینی شہید ہو چکے ہیں جبکہ 147,643 سے زائد زخمی ہوئے ہیں، جن میں اکثریت عورتوں اور بچوں کی ہے۔