کراچی (مشرق نامہ) :28 سال بعد کیے گئے ایک تازہ سروے میں انکشاف ہوا ہے کہ سندھ بھر میں 10 سے 17 سال کی عمر کے 16 لاکھ سے زائد بچے مختلف اقسام کی مزدوری میں مصروف ہیں، جن میں سے کئی خطرناک اور استحصالی ماحول میں کام کر رہے ہیں۔
یہ انکشاف سندھ چائلڈ لیبر سروے 2022-2024″ میں کیا گیا، جسے محکمہ محنت سندھ نے یونیسف اور سندھ بیورو آف اسٹیٹسٹکس کی تکنیکی معاونت سے مکمل کیا۔ رپورٹ کے مطابق، کام کرنے والے بچوں میں سے 50.4 فیصد ایسے حالات میں کام کر رہے ہیں جو ان کی صحت اور سلامتی کے لیے نقصان دہ ہیں، جن میں طویل اوقاتِ کار، شدید موسمی حالات، اور غیر محفوظ اوزار و مشینری شامل ہیں۔
ڈائریکٹر جنرل لیبر، محمد علی شاہ، جنہوں نے اس منصوبے کی قیادت کی، نے بتایا کہ رپورٹ صوبائی حکومت کو کارروائی کے لیے پیش کر دی گئی ہے۔ ان کا کہنا تھا کہ اگرچہ 1996 کے قومی سروے کی نسبت بچوں سے مزدوری کے رجحان میں تقریباً 50 فیصد کمی آئی ہے، مگر موجودہ اعداد و شمار اب بھی نہایت تشویشناک ہیں۔
رپورٹ میں بتایا گیا ہے کہ کام کرنے والے بچوں میں صرف 40.6 فیصد اسکول جاتے ہیں، جبکہ غیر کام کرنے والے بچوں میں یہ شرح 70.5 فیصد ہے۔ تعلیم میں شمولیت عمر کے ساتھ ساتھ خاص طور پر 14 سے 17 سال کی لڑکیوں میں نمایاں طور پر کم ہو جاتی ہے، جو اوسطاً ہفتے میں 13.9 گھنٹے بغیر اجرت گھریلو کام بھی کرتی ہیں، جو تعلیمی سلسلہ چھوڑنے کی ایک بڑی وجہ ہے۔
اضلاع کی سطح پر مختلف نتائج سامنے آئے ہیں۔ قمبر شہداد کوٹ میں بچوں سے مزدوری کی شرح سب سے زیادہ 30.8 فیصد ہے، اس کے بعد تھرپارکر میں 29 فیصد، ٹنڈو محمد خان میں 20.3 فیصد، اور شکارپور میں 20.2 فیصد ہے۔ کراچی میں یہ شرح سب سے کم، صرف 2.38 فیصد ہے۔
رپورٹ میں غربت اور چائلڈ لیبر کے درمیان گہرا تعلق بھی ظاہر کیا گیا ہے۔ سب سے غریب گھرانوں میں 33.7 فیصد نے بتایا کہ ان کے کم از کم ایک بچہ کام کرتا ہے۔
