اسلام آباد/واشنگٹن (مشرق نامہ): پاکستان اور امریکہ کے درمیان ٹیرف سے متعلق کامیاب مذاکرات کے بعد امریکہ نے پاکستانی برآمدات پر نیا 19 فیصد ٹیرف لاگو کرنے کا اعلان کیا ہے، جو اس سے قبل کے 29 فیصد شرح سے نمایاں کمی ہے۔ وزارتِ خزانہ نے اس فیصلے کو امریکہ کی جانب سے ایک متوازن اور مستقبل بین حکمت عملی قرار دیا ہے، جس سے پاکستان کو خطے کے دیگر ممالک جیسے بھارت (25 فیصد) اور بنگلہ دیش/ویتنام (20 فیصد) کے مقابلے میں مسابقتی برتری حاصل ہوگی۔
وزارت کے مطابق، خاص طور پر ٹیکسٹائل کا شعبہ — جو کہ پاکستان کی برآمدات کی ریڑھ کی ہڈی ہے — اس فیصلے سے براہ راست فائدہ اٹھائے گا۔ پاکستانی حکام نے برآمدکنندگان پر زور دیا ہے کہ وہ امریکی مارکیٹ میں رسائی بڑھانے کے لیے جارحانہ اور ہدف پر مبنی مارکیٹنگ حکمت عملی اختیار کریں۔
حکومت نے دیگر شعبوں جیسے مصنوعی ذہانت، کرپٹو کرنسی، معدنیات، توانائی اور سرمایہ کاری میں بھی امریکہ کے ساتھ تعاون بڑھانے کے عزم کا اعادہ کیا ہے، اور کہا ہے کہ پاکستان صدر ٹرمپ کی انتظامیہ کے ساتھ اقتصادی ترقی اور مشترکہ خوشحالی کے لیے قریبی روابط جاری رکھے گا۔
عالمی سطح پر ٹرمپ انتظامیہ نے دیگر 70 ممالک پر 10 سے 41 فیصد تک کے نئے محصولات کا اعلان کر دیا ہے، تاہم پاکستان کو اس اقدام سے جزوی استثنا حاصل ہوا ہے، جو پاکستان کی سفارتی کامیابی کے طور پر دیکھا جا رہا ہے۔
