جدید سیٹلائٹ ماحولیاتی نگرانی، شہری منصوبہ بندی اور قدرتی آفات کی پیشگی وارننگ میں معاون
اسلام آباد (مشرق نامہ) –
پاکستان کا جدید ترین ریموٹ سینسنگ سیٹلائٹ بدھ کے روز چین کے ژیچانگ سیٹلائٹ لانچ سینٹر سے کامیابی کے ساتھ خلا میں بھیج دیا گیا۔ یہ پیشرفت نہ صرف قومی خلائی پروگرام کی اہم سنگِ میل ہے بلکہ ماحولیاتی تحفظ، قدرتی وسائل کی نگرانی اور شہری ترقی کے میدان میں پاکستان کی استعداد میں نمایاں اضافہ کرے گی۔
سرکاری خلائی ادارے "اسپارکو” کے مطابق، اس سیٹلائٹ کی لانچنگ میں پاکستانی سائنسدان بھی چین میں موجود رہے اور اس پورے عمل کی نگرانی کی۔ ترجمان نے بتایا کہ یہ نیا سیٹلائٹ ریموٹ سینسنگ کے قومی بیڑے کو مزید تقویت دے گا اور اس کی مدد سے شہری منصوبہ بندی، زراعت، گلیشیئرز کے پگھلاؤ، جنگلات کی کٹائی، سیلاب، زلزلے اور دیگر قدرتی آفات کی مؤثر نگرانی ممکن ہو سکے گی۔
ترجمان اسپارکو نے مزید کہا کہ یہ سیٹلائٹ ماحولیاتی تبدیلیوں کی جدید نگرانی، قدرتی وسائل کے تحفظ اور ملک میں پیشگی وارننگ سسٹم کو بہتر بنانے میں کلیدی کردار ادا کرے گا۔ اس منصوبے کو اسپارکو کے "ویژن 2047” اور قومی خلائی پالیسی کا عملی مظہر قرار دیا گیا ہے۔
لانچنگ کی براہِ راست نگرانی اسلام آباد میں انسٹیٹیوٹ آف اسپیس ٹیکنالوجی اور کراچی میں اسپارکو کے ہیڈکوارٹر سے کی گئی۔ اس دوران ملکی و غیر ملکی ماہرین نے اس پیشرفت کو پاکستان کے لیے ایک بڑا سائنسی و تکنیکی قدم قرار دیتے ہوئے اسے قومی صلاحیتوں میں اہم اضافہ قرار دیا۔
یہ سیٹلائٹ نہ صرف زمینی مشاہدے کی جدید سہولیات فراہم کرے گا بلکہ ملک کو قدرتی آفات سے نمٹنے کے لیے مزید مستعد بنانے میں بھی مدد دے گا۔ تجزیہ کاروں کے مطابق یہ لانچنگ خطے میں پاکستان کی خلائی صلاحیتوں کے فروغ کی علامت ہے اور مستقبل میں معاشی و تکنیکی خودکفالت کی بنیاد فراہم کرے گی۔
