جنیوا (مشرق نامہ): قومی اسمبلی کے اسپیکر سردار ایاز صادق نے جمعرات کے روز اسلامی جمہوریہ ایران کی مجلس شورائے اسلامی کے اسپیکر ڈاکٹر محمد باقر قالیباف سے ملاقات کے دوران ایران کے خلاف حالیہ اسرائیلی جارحیت کی شدید الفاظ میں مذمت کی۔
یہ ملاقات جنیوا میں 29 تا 31 جولائی 2025 کو منعقدہ چھٹی عالمی اسپیکرز کانفرنس کے موقع پر ہوئی۔
ملاقات کے دوران اسپیکر ایاز صادق نے پاکستان اور ایران کے درمیان تاریخی اور برادرانہ تعلقات کو اجاگر کیا۔ انہوں نے کہا کہ ہم بطور ہمسایہ اور دوست، امن، استحکام اور خوشحالی کی مشترکہ خواہشات کے ذریعے ایک دوسرے سے جڑے ہوئے ہیں۔ انہوں نے دونوں ممالک کے درمیان تعاون اور باہمی احترام کو جاری رکھنے کی اہمیت پر زور دیا۔
اسپیکر قومی اسمبلی نے ایران کے خلاف اسرائیل کی بلاجواز جارحیت کی سخت مذمت کرتے ہوئے ایران کی خودمختاری اور علاقائی سالمیت کے لیے پاکستان کی غیر متزلزل حمایت کا اعادہ کیا۔
انہوں نے ایران کے تحمل مزاج اور ذمہ دارانہ ردعمل کو سراہتے ہوئے اس کی ان کوششوں کی تعریف کی جن کے ذریعے بڑے پیمانے پر تصادم کو روکا گیا۔ انہوں نے اس بات پر زور دیا کہ پاکستان مشرقِ وسطیٰ اور مغربی ایشیا میں امن کا خواہاں ہے۔
اسپیکر ایاز صادق نے ایران کے جوہری مسئلے کے پرامن حل پر پاکستان کے مستقل مؤقف کو دہراتے ہوئے کہا، "پاکستان ہمیشہ مکالمے، سفارتی روابط اور کثیرالجہتی تعاون کے ذریعے اس مسئلے کے حل کا حامی رہا ہے۔”
دونوں اسپیکروں نے پاکستان اور ایران کی پارلیمانوں کے تعمیری کردار کو سراہا، خاص طور پر پاک-ایران پارلیمانی دوستی گروپوں کی اہمیت کو اجاگر کیا، جو پارلیمانی اور عوامی روابط کو مزید مستحکم کرنے میں معاون ثابت ہو رہے ہیں۔
انہوں نے علاقائی امن اور ترقی کے لیے پارلیمانی سفارت کاری کے ذریعے باہمی تعاون کو مزید فروغ دینے پر اتفاق کیا۔
