اسلام آباد(مشرق نامہ): وفاقی حکومت نے گوادر میں ترقیاتی منصوبوں کے لیے 13.63 ارب روپے سے زائد کے فنڈز مختص کیے ہیں تاکہ اس اہم ساحلی شہر کی معاشی، تعلیمی، انفراسٹرکچر اور سماجی ترقی کو فروغ دیا جا سکے۔ منصوبوں میں گوادر-رتوڈیرو موٹروے (M-8) کے لیے 3 ارب روپے، نئے گوادر انٹرنیشنل ایئرپورٹ کے لیے 4 ارب روپے، اور گوادر سیف سٹی پراجیکٹ کے لیے 1.5 ارب روپے شامل ہیں۔ یونیورسٹی آف گوادر فیز 1 کے لیے 50 کروڑ، پینے کے پانی کی فراہمی، سینی ٹیشن، لینڈ فل، اور ماڈل کسٹم کلکٹوریٹ جیسے منصوبوں کے لیے بھی خطیر رقم مختص کی گئی ہے۔ اولڈ ٹاؤن کی بحالی، شینزک ڈیم، اور فری زون کے لیے بجلی کی ترسیل کے منصوبے بھی ترقیاتی ایجنڈے میں شامل ہیں۔ حکومت کا کہنا ہے کہ یہ منصوبے نہ صرف گوادر کو ایک جدید بندرگاہی شہر بنانے میں مدد دیں گے بلکہ پورے خطے کے لیے تجارتی اور معاشی سرگرمیوں کو فروغ دیں گے۔
