ایمسٹرڈیم (مشرق نامہ) – تاریخ میں پہلی بار، نیدرلینڈز نے "اسرائیل” کو اپنی قومی سلامتی کے لیے ایک بیرونی خطرہ قرار دیا ہے۔
یہ انکشاف ملک کی مرکزی انسدادِ دہشت گردی ایجنسی نیشنل کوآرڈینیٹر فار سیکیورٹی اینڈ کاؤنٹر ٹیررازم (NCTV) کی حالیہ رپورٹ میں کیا گیا ہے، جسے اناطولیہ ایجنسی نے نقل کیا۔
رپورٹ بعنوان “ریاستی عناصر سے لاحق خطرات کی جانچ” میں "اسرائیل” کی ان کوششوں کو نمایاں کیا گیا ہے جن کے ذریعے وہ نیدرلینڈز میں عوامی رائے پر اثرانداز ہونے اور سیاسی فیصلوں کو متاثر کرنے کے لیے گمراہ کن اطلاعات پر مبنی مہمات چلا رہا ہے۔
رپورٹ میں ایک واقعہ کا حوالہ دیا گیا ہے جس میں "اسرائیلی” وزارت نے گزشتہ سال غیر سرکاری ذرائع سے ڈچ صحافیوں اور سیاستدانوں کو ایک دستاویز بھیجی۔ اس دستاویز میں ڈچ شہریوں کے بارے میں غیرمعمولی اور ناپسندیدہ ذاتی معلومات شامل تھیں۔ یہ واقعہ اس وقت پیش آیا جب ایمسٹرڈیم میں فلسطین مخالف مظاہروں کے دوران مکابی "تل ابیب” فٹبال ٹیم کے حامیوں کی سرگرمیوں کے بعد کشیدگی پیدا ہوئی تھی۔
NCTV نے "اسرائیل” اور امریکہ کی جانب سے بین الاقوامی فوجداری عدالت (ICC) کو درپیش بڑھتے ہوئے خطرات پر بھی تشویش ظاہر کی، جو دی ہیگ میں واقع ہے۔
ایجنسی کے مطابق، یہ خطرات عدالت کی کارروائیوں میں رکاوٹ ڈال سکتے ہیں۔ نیدرلینڈز چونکہ کئی بین الاقوامی قانونی اداروں کی میزبانی کرتا ہے، اس لیے اس پر ان اداروں کو بیرونی دباؤ سے محفوظ رکھنے کی "خصوصی ذمہ داری” عائد ہوتی ہے۔
2024 میں لو موند اور گارڈین کی جانب سے "اسرائیلی” میگزین 972+ اور لوکل کال کے ساتھ مل کر کی گئی تحقیق میں انکشاف ہوا تھا کہ "اسرائیل” نے ICC اہلکاروں کے خلاف ایک 9 سالہ مہم چلائی، جس میں نگرانی، ہیکنگ اور دھمکیوں کے ذریعے ان پر دباؤ ڈالنے کی کوشش کی گئی تاکہ "اسرائیلی” رہنماؤں کو قانونی کارروائی سے بچایا جا سکے۔
