تهران (مشرق نامہ)– ابنا نیوز ایجنسی کے مطابق، ایران کے وزیر خارجہ عباس عراقچی اور بنگلہ دیشی وزیر خارجہ توحید حسین نے جمعرات کے روز ایک ٹیلیفونک گفتگو میں دوطرفہ تعلقات کے ساتھ ساتھ علاقائی و بین الاقوامی امور پر تبادلہ خیال کیا۔
اس گفتگو کے دوران عباس عراقچی نے صیہونی حکومت کے جرائم، بالخصوص فلسطینی عوام کو پانی اور خوراک سے محروم رکھنے کی شدید مذمت کی اور اسلامی ممالک سے مطالبہ کیا کہ وہ فوری طور پر اسلامی تعاون تنظیم (او آئی سی) کا ہنگامی اجلاس بلائیں اور دیگر بین الاقوامی میکانزم کو فعال کریں تاکہ غزہ میں جاری نسل کشی کو روکا جا سکے اور جارحیت پسند صیہونی حکومت کا مؤثر انداز میں مقابلہ کیا جا سکے۔
ایرانی وزیر خارجہ نے غربِ اردن کو اسرائیلی ریاست میں ضم کرنے کے منصوبے کو بھی صیہونی حکومت کے مجرمانہ عزائم کا ایک اور ثبوت قرار دیا اور کہا کہ یہ فلسطین کو مکمل طور پر مٹانے کے منصوبے کا تسلسل ہے۔ انہوں نے زور دیا کہ اسلامی ممالک متحد ہو کر فیصلہ کن اور ہم آہنگ اقدام کریں اور نہتے فلسطینی عوام کو فوری انسانی امداد فراہم کریں۔
بنگلہ دیشی وزیر خارجہ توحید حسین نے بھی اسرائیلی جرائم کی مسلسل مذمت کی اور زور دیا کہ مظلوم فلسطینی عوام کی حمایت کے لیے فوری، مؤثر اور مربوط اقدامات کیے جائیں، خاص طور پر اسلامی تعاون تنظیم کے پلیٹ فارم سے۔
ٹیلیفونک رابطے کے دوران دونوں ممالک کے وزرائے خارجہ نے دوطرفہ تعلقات کا جائزہ لیا اور اس بات پر زور دیا کہ دونوں ممالک کی قیادتیں باہمی روابط کے فروغ اور مسلسل مشاورت کی خواہاں ہیں۔
