صنعا (مشرق نامہ) – یمن کی اعلیٰ سیاسی کونسل کے سربراہ مہدی المشاط نے اسلامی و عرب اقوام اور حکومتوں سے مطالبہ کیا ہے کہ وہ اسرائیلی حکومت کے بڑھتے ہوئے خطرات کے مقابل متحد اور مؤثر مؤقف اپنائیں اور غزہ کے محصور عوام کی جانیں بچانے کے لیے فوری اقدامات کریں۔
یمنی سرکاری خبر رساں ادارے سبأ کو دیے گئے ایک انٹرویو میں مہدی المشاط نے کہا کہ آج، اس سے پہلے کے کسی بھی وقت سے بڑھ کر، امتِ مسلمہ کو صیہونی حکومت کے خطرے کو روکنے کے لیے ایک مضبوط اور متحد مؤقف کی ضرورت ہے، قبل اس کے کہ یہ خطرہ سب کو اپنی لپیٹ میں لے لے۔
انہوں نے زور دے کر کہا کہ جو آج غزہ اور فلسطین کے مسئلے پر کوئی مؤقف اختیار نہیں کرتے، وہ مستقبل میں بھی اس خطرے کا مقابلہ کرنے کے قابل نہیں ہوں گے۔ ان کا کہنا تھا کہ جو لوگ غزہ میں بھوک سے جاں بحق ہونے والے مظلوموں کے دردناک مناظر سے متأثر نہیں ہوتے، وہ دین، غیرت، اسلام اور انسانیت کی حقیقت سے ناآشنا ہیں۔
اعلیٰ سیاسی کونسل کے سربراہ نے عرب و اسلامی ممالک کے حکمرانوں کو مخاطب کرتے ہوئے کہا کہ اگر آپ خود کوئی اقدام نہیں کر سکتے، تو کم از کم اقوام کو اس مسئلے میں مداخلت کی اجازت دیں، اور اگر اقوام بھی خاموش رہیں تو اس خاموشی کی سزا پوری امتِ مسلمہ کو بھگتنا پڑے گی۔
مہدی المشاط نے واضح کیا کہ سب کو یہ جان لینا چاہیے کہ صیہونی حکومت ہی تمام مسائل کی جڑ ہے، اور اس کے ساتھ امن اور مصالحت کے سراب کے پیچھے دوڑنا محض گمراہی ہے۔
