فلورنس (مشرق نامہ) – فلسطینی حقوق کے حق میں بڑھتی ہوئی عالمی تحریک اور اسرائیل کے خلاف بین الاقوامی تعلیمی بائیکاٹ کی مہم کے تحت، یونیورسٹی آف فلورنس کے پانچ ڈیپارٹمنٹس نے اسرائیلی تعلیمی اداروں سے اپنے روابط منقطع کر دیے ہیں۔
اتوار کے روز، فلورنس یونیورسٹی کے کمپیوٹر سائنس و ریاضی کے شعبے نے بین گوریون یونیورسٹی آف نیگیو سے اپنا اشتراک ختم کر دیا۔ بین گوریون یونیورسٹی اسرائیلی فوجی و صنعتی کمپلیکس سے گہرے تعلقات رکھنے والی ایک معروف ادارہ ہے۔ اس ادارے میں نوبیل انعام یافتہ دان شیختمان بھی موجود ہیں، جو صہیونی تعلیمی نیٹ ورکس کی حمایت کرتے ہیں۔
زرعی سائنسز، انجینئرنگ اور ٹیکنالوجی کے شعبہ جات نے بھی اسی اقدام کے تحت اپنے اسرائیلی ہم منصب اداروں سے تعاون معطل کر دیا ہے۔
آرکیٹیکچر کا شعبہ خاص طور پر مغربی کنارے میں قائم غیر قانونی یہودی بستی میں واقع آریل یونیورسٹی سے تعلق ختم کر چکا ہے۔ اس فیصلے سے یہ واضح پیغام دیا گیا ہے کہ یونیورسٹی ایسے اداروں کے ساتھ کسی قسم کا تعلق رکھنا قبول نہیں کرتی جو مقبوضہ فلسطینی علاقوں پر ناجائز قبضے میں ملوث ہوں۔
یہ بائیکاٹ ایسے وقت پر سامنے آیا ہے جب اسرائیل کی غزہ پر جاری نسل کش جنگ اور طویل مدت سے جاری قبضے پر دنیا بھر میں شدید تنقید کی جا رہی ہے۔ مختلف ممالک میں تعلیمی حلقے اور طلبہ اپنے اداروں پر زور دے رہے ہیں کہ وہ اسرائیل سے وابستہ ان اداروں سے لاتعلقی اختیار کریں جو نسل پرستی، فوجی تحقیق یا قبضے کو دوام دینے میں شریک ہوں۔
بی ڈی ایس (بائیکاٹ، انویسٹمنٹ کی واپسی اور پابندیاں) کی عالمی مہم، جو جنوبی افریقہ کی نسل پرست حکومت کے خلاف تحریک سے متاثر ہے، اسرائیل کی جانب سے غزہ میں جاری نسل کشی کے تناظر میں نئی جان پکڑ چکی ہے۔ اطلاعات کے مطابق، اب تک تقریباً 59,000 فلسطینی شہید ہو چکے ہیں جن میں اکثریت بچوں اور خواتین کی ہے۔
