اسلام آباد (مشرق نامہ) – سیکیورٹی فورسز نے کلات کے علاقے پہرود میں انٹیلی جنس کی بنیاد پر کیے گئے ایک کامیاب آپریشن کے دوران کالعدم علیحدگی پسند تنظیم سے تعلق رکھنے والے چار دہشتگردوں کو ہلاک کر دیا۔
سرکاری بیان کے مطابق، یہ آپریشن ہفتہ اور اتوار کی درمیانی شب دہشتگردوں کی موجودگی کی اطلاع پر کیا گیا۔ فورسز نے دہشتگردوں کے ٹھکانے کے قریب مؤثر پوزیشن سنبھالی اور شدید فائرنگ کے تبادلے کے بعد انہیں ہلاک کر دیا۔
کارروائی کے دوران سیکیورٹی فورسز نے دہشتگردوں کے قبضے سے بھاری مقدار میں اسلحہ، گولہ بارود اور بارودی مواد بھی برآمد کیا۔ علاقے میں کلیئرنس اور سینیٹائزیشن کا عمل تاحال جاری ہے۔
یہ آپریشن ایسے وقت میں عمل میں آیا ہے جب حالیہ دنوں میں کلات میں کراچی جانے والی مسافر بس پر فائرنگ کے نتیجے میں کم از کم تین افراد جاں بحق اور سات زخمی ہو چکے تھے۔ اس سے قبل 11 جولائی کو لورالائی میں دہشتگردوں نے بسوں سے اتار کر نو مسافروں کو اغوا کے بعد قتل کر دیا تھا۔
صدر آصف علی زرداری، وزیراعظم شہباز شریف اور وزیراعلیٰ بلوچستان میر صرفراز بگٹی نے سیکیورٹی فورسز کو کامیاب آپریشن پر مبارکباد دی ہے۔
صدر زرداری نے اپنے بیان میں کہا کہ ریاست دہشتگردی کے مکمل خاتمے کے لیے قوم کی مدد سے ہر ممکن اقدام کرے گی۔ انہوں نے کہا کہ ریاست دہشتگردوں کے خلاف مکمل قوت سے کارروائی جاری رکھے گی۔ فتنۂ ہندوستان کے دہشتگردوں کا خاتمہ یقینی بنایا جائے گا۔ واضح رہے کہ بھارت سے روابط کے باعث کالعدم علیحدگی پسند تنظیموں سے وابستہ دہشتگردوں کو "فتنۂ ہندوستان” سے بھی موسوم کیا جاتا ہے۔
وزیراعظم شہباز شریف نے اپنے بیان میں کہا کہ پوری قوم دہشتگردی کے خلاف جنگ میں سیکیورٹی فورسز کے ساتھ کھڑی ہے۔ انہوں نے کہا کہ حکومت ملک سے ہر قسم کی دہشتگردی کے خاتمے کے لیے پرعزم ہے۔
وزیراعلیٰ بلوچستان میر صرفراز بگٹی نے سیکیورٹی فورسز کی پیشہ ورانہ صلاحیت اور غیرمتزلزل عزم کو سراہتے ہوئے بروقت انٹیلی جنس اور فوری ردِعمل پر اطمینان کا اظہار کیا۔
انہوں نے کہا کہ پہرود میں دہشتگردی کی کارروائی کے خلاف فورسز کا فوری ردعمل قابلِ تحسین ہے۔ ہماری سیکیورٹی فورسز نے ایک بار پھر اپنی تیاری اور صوبے کے دفاع کے لیے عزم کا ثبوت دیا ہے.
وزیراعلیٰ نے مذکورہ تنظیم کو قومی سلامتی کے لیے خطرہ قرار دیتے ہوئے ریاست دشمن عناصر کے خلاف فیصلہ کن کارروائی جاری رکھنے کے عزم کا اعادہ کیا۔
انہوں نے کہا کہ ریاست دشمن عناصر کے خلاف آپریشنز ہر محاذ پر جاری رہیں گے۔ بلوچستان کے امن کو سبوتاژ کرنے کی ہر کوشش کو کچل دیا جائے گا۔
انہوں نے آپریشن کو دشمن عناصر کے لیے واضح پیغام قرار دیتے ہوئے کہا کہ فتنۂ ہندوستان کے مذموم عزائم خاک میں ملا دیے گئے ہیں۔
انہوں نے کہا کہ ان کے منصوبے تباہ ہو چکے ہیں۔ ہماری فورسز نے ان کے شیطانی عزائم کو شکست دی ہے.
وزیراعلیٰ نے آپریشن میں حصہ لینے والے جوانوں کو خراجِ تحسین پیش کرتے ہوئے کہا کہ ان کی کامیابی پاکستان کی سیکیورٹی فورسز کی مستعدی اور قربانیوں کا منہ بولتا ثبوت ہے۔
انہوں نے مزید کہا کہ انہوں نے ایک بار پھر دشمن کے ناپاک عزائم کو ناکام بنایا اور قومی سلامتی کے لیے اپنی غیرمتزلزل وابستگی کا ثبوت دیا ہے.
