مانیٹرنگ ڈیسک (مشرق نامہ)سابق امریکی صدر ڈونلڈ ٹرمپ نے دعویٰ کیا ہے کہ BRICS گروپ تیزی سے ختم ہو رہا ہے، اور خبردار کیا کہ اگر اس اتحاد نے امریکی ڈالر کو چیلنج کرنے کی کوشش کی تو اسے سخت اقتصادی ردِعمل کا سامنا کرنا پڑے گا۔
جمعے کو وائٹ ہاؤس میں خطاب کرتے ہوئے ٹرمپ نے کہا:انہوں نے ڈالر پر قبضہ کرنے اور اس کی بالادستی کو ختم کرنے کی کوشش کی، اور میں نے کہا کہ جو بھی BRICS اتحاد کا حصہ ہے، ہم اس پر 10 فیصد ٹیرف (محصول) عائد کریں گے۔
ٹرمپ نے زور دیا کہ واشنگٹن امریکی ڈالر کی بالادستی برقرار رکھنے کے لیے ہر ممکن اقدام کرے گا۔ انہوں نے کہا:ریزرو کرنسی بہت اہم ہے، اگر ہم نے اسے کھو دیا، تو یہ کسی عالمی جنگ ہارنے جیسا ہو گا۔
ٹرمپ نے مزید کہا کہ BRICS کو بہت سخت نشانہ بنایا جائے گا، اور اگر یہ گروہ واقعی کسی مؤثر شکل میں قائم ہوا تو یہ بہت جلد ختم ہو جائے گا۔
ٹرمپ نے دعویٰ کیا کہ ان کی 10 فیصد ٹیرف کی دھمکی نے اس مہینے ریو ڈی جنیرو میں ہونے والے BRICS سربراہی اجلاس کوناکام کر دیا، لیکن حقیقت یہ ہے کہ اجلاس میں اعلیٰ سطح کی بھرپور شرکت ہوئی۔ اگرچہ چینی صدر شی جن پنگ اجلاس میں شریک نہ ہو سکے، مگر ان کی نمائندگی وزیرِاعظم لی چیانگ نے کی۔ روسی صدر ولادیمیر پوتن بھی ذاتی طور پر شریک نہ ہوئے، تاہم انہوں نے ورچوئل خطاب کیا۔
برازیل کے صدر لولا ڈا سلوا، بھارتی وزیرِاعظم نریندر مودی، جنوبی افریقہ کے صدر سیرل راما فوسا، انڈونیشیا کے صدر پرابوو سبیانتو اور مصر، ایتھوپیا، ایران و یو اے ای کے رہنما اجلاس میں موجود تھے۔
اکتوبر میں روسی وزیرِ خزانہ انتون سیلوانوف نے بتایا تھا کہ BRICS ممالک کے درمیان باہمی تجارت میں 65 فیصد ادائیگیاں مقامی کرنسیوں میں ہو رہی ہیں، جبکہ ڈالر اور یورو کا حصہ 30 فیصد سے بھی کم رہ گیا ہے۔
حال ہی میں روسی وزیرِ خارجہ سرگئی لاوروف نے کہا کہ BRICS ممالک ڈالر کے متبادل تلاش کر رہے ہیں تاکہ امریکہ کی من مانیاں برداشت نہ کرنی پڑیں۔
تاہم روسی نائب وزیرِ خارجہ سرگئی ریابکوف نے واضح کیا کہ BRICS کا مقصد کبھی امریکہ کا حریف بننا نہیں تھا، لیکن خبردار کیا کہ دھمکیوں اور دباؤ کی زبان، BRICS کے ساتھ بات کرنے کا درست طریقہ نہیں ہے۔
