کیلیفورنیا (مشرق نامہ) – یوٹیوب نے تخلیق کاروں کے لیے مونیٹائزیشن پالیسی میں اہم تبدیلیوں کا اعلان کیا ہے، جس کے تحت اب ایسے ویڈیوز جنہیں مصنوعی ذہانت (AI) سے مشینی انداز میں تیار کیا گیا ہو اور جن میں تخلیقی عنصر یا ذاتی شمولیت موجود نہ ہو، مونیٹائزیشن کے اہل نہیں ہوں گے۔
ویڈیو اسٹریمنگ پلیٹ فارم نے وضاحت کی ہے کہ ری ایکشن، کمنٹری اور کلپ ویڈیوز اب بھی مونیٹائز کیے جا سکتے ہیں، بشرطیکہ ان میں تخلیقی اور اصل مواد شامل ہو۔
یوٹیوب نے نئی پالیسی کا مقصد پلیٹ فارم پر تیزی سے پھیلنے والے ایسے غیر معیاری اور کم محنت سے تیار کردہ AI مواد کی روک تھام قرار دیا ہے جو انسانی تخلیق کی نقل تو کرتے ہیں مگر ان میں اصل انفرادیت اور جدت کا فقدان ہوتا ہے۔
"ریپیٹیٹیو” کے بجائے "ان آتھینٹک” مواد
یوٹیوب نے اپنی پرانی اصطلاح "Repetitious Content” (دہرایا گیا مواد) کو تبدیل کرتے ہوئے اب اسے "Inauthentic Content” (غیر اصلی مواد) کا نام دیا ہے تاکہ اس کی معیاری اور اصل تخلیق کے عزم کو بہتر طور پر واضح کیا جا سکے۔ یوٹیوب کے ہیلپ پیج پر جاری نوٹ میں بتایا گیا ہے کہ اس قسم کا غیر مستند مواد پہلے بھی مونیٹائزیشن کے لیے نااہل تھا، اور اب بھی اسی اصول پر سختی سے عمل کیا جائے گا۔
ری یوزڈ کنٹینٹ پالیسی برقرار
یوٹیوب نے واضح کیا ہے کہ ری یوزڈ کنٹینٹ پالیسی میں کوئی تبدیلی نہیں کی گئی، جس کے تحت کمنٹری، کلپس، کمپائلیشنز اور ری ایکشن ویڈیوز مونیٹائزیشن کے اہل تب ہی ہوں گے جب ان میں تخلیقی ترمیم شامل ہو۔
یوٹیوب کے مطابق غیر اصلی مواد کی مثالیں:
صرف ویب سائٹس یا نیوز فیڈز کا متن پڑھنے والی ویڈیوز
سلائیڈ شوز یا سکرولنگ ٹیکسٹ جن میں کمنٹری، بیانیہ یا تعلیمی پہلو شامل نہ ہو
ایسے ویڈیوز جو AI سے مشینی انداز میں بنائے گئے ہوں اور جن میں تخلیق کار کی ذاتی شمولیت نہ ہو
یوٹیوب نے تخلیق کاروں کو خبردار بھی کیا ہے کہ وہ ایسا مواد اپلوڈ نہ کریں جو پہلے سے بڑے پیمانے پر شیئر کیا جا چکا ہو یا بغیر کسی تخلیقی ترمیم کے دوبارہ اپلوڈ کیا گیا ہو۔
یہ پالیسی ایک ایسے وقت میں سامنے آئی ہے جب AI سے تیار شدہ ویڈیوز کی بھرمار یوٹیوب پر تخلیقی ماحول کو متاثر کر رہی ہے۔ یوٹیوب کا مقصد تخلیق کاروں کو معیار، جدت اور ذاتی انفرادیت کی جانب واپس لانا ہے تاکہ ناظرین کو ایک زیادہ مستند اور بامعنی تجربہ فراہم کیا جا سکے۔
