بیجنگ (مشرق نامہ) – چین کی معروف تجارتی کمپنی امپیریل وینچرز نے رواں سال پاکستان سے 50 ہزار کلوگرام آم درآمد کرنے کا اعلان کیا ہے، جس سے دو لاکھ امریکی ڈالر سے زائد کی تجارت متوقع ہے۔ یہ بات کمپنی کے ڈائریکٹر عدنان حفیظ نے ایک بیان میں بتائی۔
انہوں نے بتایا کہ اس منصوبے کے تحت پاکستانی آم کی پہلی کھیپ، جو تین ہزار کلوگرام پر مشتمل تھی، گزشتہ ماہ ارومچی ایکسپو میں پاکستان پویلین کی نمائش کے لیے روانہ کی گئی۔ دوسری کھیپ، جس کا وزن دو ہزار کلوگرام تھا، 7 جولائی کو چین پہنچی جبکہ تیسری کھیپ بھی تقریباً اتنی ہی مقدار میں حال ہی میں کنمنگ شہر میں موصول ہو چکی ہے۔
عدنان حفیظ نے کہا کہ چینی صارفین پاکستانی آموں کے بڑے سائز، شوخ زرد رنگ اور بھرپور مٹھاس کو بے حد پسند کرتے ہیں، جس کے باعث ان کی مقبولیت میں تیزی سے اضافہ ہو رہا ہے۔ زیادہ تر آم آن لائن پلیٹ فارمز کے ذریعے فروخت کیے جا رہے ہیں۔
انہوں نے مزید بتایا کہ ان کی ٹیم چینی منڈی میں پاکستانی آموں کے فروغ کے ساتھ ساتھ ان کی پیکجنگ، ذخیرہ کرنے اور معیار کو بہتر بنانے پر بھی کام کر رہی ہے تاکہ مارکیٹ میں فروخت کے امکانات مزید وسیع ہو سکیں۔
ایئر کارگو کے بڑھتے ہوئے اخراجات پر گفتگو کرتے ہوئے عدنان حفیظ نے کہا کہ وہ لاگت کم کرنے کے لیے غیر پکے آموں کو بلک پیکنگ میں بھیجنے کی حکمت عملی اپنا رہے ہیں۔ ان کے مطابق، چینی صارفین جنوبی ایشیائی خصوصاً پاکستانی آموں میں خصوصی دلچسپی رکھتے ہیں، اور ان کا ذائقہ انہیں دیگر اقسام سے ممتاز بناتا ہے۔
