(مشرق نامہ)ایران کی صحافیوں کی یونین کے سربراہ مشّاء اللہ شمسالواعظین نے المیادین چینل کے مغربی کنارے میں بیورو چیف ناصر اللحام کی گرفتاری کی شدید مذمت کرتے ہوئے اسے آزادی صحافت پر کھلا حملہ قرار دیا ہے۔ انہوں نے کہا کہ اسرائیل میڈیا پر اپنا قبضہ برقرار رکھنے میں ناکام ہو چکا ہے اور فلسطینی و مزاحمتی بیانیہ دنیا بھر میں مقبول ہو رہا ہے، جس سے اسرائیل سخت بوکھلاہٹ کا شکار ہے۔
شمسالواعظین نے اس اقدام کو اسرائیل کی گھبراہٹ کا نتیجہ قرار دیتے ہوئے کہا کہ ناصر اللحام جیسے مزاحمتی صحافی اب عالمی ضمیر کے لیے علامت بن چکے ہیں۔ انہوں نے عرب دنیا، خاص طور پر لبنان، شام، مصر اور فلسطینی صحافتی تنظیموں پر زور دیا کہ وہ اسرائیلی مظالم کے خلاف متحدہ آواز اٹھائیں کیونکہ اب خاموشی مزید ناقابلِ قبول ہے۔
انہوں نے مزید انکشاف کیا کہ حالیہ 12 روزہ جنگ کے آخری 48 گھنٹوں میں ایران نے انتہائی جدید سائبر حملے کیے جنہوں نے اسرائیلی دفاعی نظام کو مفلوج کر دیا، اور ایرانی میزائلوں نے اپنے اہداف پر غیر معمولی درستگی سے وار کیا۔ ان کے مطابق، ایران اب ایٹمی ابہام کی پالیسی پر عمل پیرا ہے، جس کے تحت نہ تو مکمل شفافیت دی جائے گی اور نہ ہی جوہری صلاحیتوں کا انکار یا اعتراف کیا جائے گا۔
ایرانی وزارتِ خارجہ نے بھی ناصر اللحام کی گرفتاری کو انسانی حقوق کی سنگین خلاف ورزی قرار دیا اور ان کی فوری رہائی کا مطالبہ کیا ہے۔ شمسالواعظین کے مطابق، اسرائیل ایران کی فلسطین کے حق میں قائدانہ حیثیت سے خوفزدہ ہے اور مغربی طاقتیں ایران کو اندر سے کمزور کرنے کے لیے اسے سات حصوں میں تقسیم کرنے کی خفیہ منصوبہ بندی پر کام کر رہی ہیں۔ انہوں نے اسے "بن گوریون منصوبے” کی نئی شکل قرار دیا۔
