اسلام آباد(مشرق نامہ):سویڈن کی حکومت نے پیر کے روز اسلام آباد میں ویزا سروسز کی بحالی کا اعلان کیا ہے۔ یہ فیصلہ پاکستان اور سویڈن کی وزارتِ خارجہ کے درمیان 2 جولائی کو اسٹاک ہوم میں ہونے والی دو طرفہ سیاسی مشاورت (BPC) کے بعد سامنے آیا۔
وزارتِ خارجہ کی جانب سے جاری کردہ پریس ریلیز میں کہا گیا ہے کہ اس فیصلے سے ان پاکستانیوں کو سہولت ملے گی جو سویڈن کا مختصر دورہ کرنا چاہتے ہیں۔ پاکستان نے اس مثبت پیش رفت کا خیرمقدم کیا ہے، جو دونوں ممالک کے درمیان مضبوط ہوتے تعلقات کی عکاسی کرتی ہے۔
یہ سہولت 7 جولائی سے نافذ العمل ہو چکی ہے، جس کے بعد پاکستانی شہری اب پاکستان سے ہی سویڈن کے لیے 90 دن تک قیام کی شینجن ویزا درخواست دے سکتے ہیں۔
اسٹاک ہوم میں ہونے والی دو طرفہ مشاورت میں پاکستانی وفد کی قیادت ایڈیشنل سیکرٹری برائے یورپ نے کی، جبکہ سویڈن کی طرف سے وزارتِ خارجہ کے ڈائریکٹر جنرل برائے عالمی امور نے وفد کی سربراہی کی۔
