(مشرق نامہ)پاکستانی طلبہ نے عالمی سطح پر مصنوعی ذہانت (AI) کے مؤثر استعمال پر نمایاں کامیابی حاصل کی ہے، جس کا اعتراف انہیں فلپائن میں ہونے والے 2025 ایشیا پیسیفک سلوشن چیلنج میں "بہترین AI استعمال” کے ایوارڈ سے نواز کر کیا گیا۔ اس مقابلے کا انعقاد گوگل اور ایشیائی ترقیاتی بینک (ADB) کے اشتراک سے کیا گیا، جس میں 12 ممالک کی 750 سے زائد ٹیموں نے حصہ لیا۔ اسلام آباد کے انسٹی ٹیوٹ آف اسپیس ٹیکنالوجی (IST) کی ٹیم "GeoGemma” نے سیٹلائٹ امیجری اور Gemini AI کے ذریعے ایک ایسا جدید نظام تیار کیا جو قدرتی آفات کے خطرات کی پیشگی اطلاع اور تجزیہ فراہم کرتا ہے۔ اس ٹیم میں احمد اقبال، حنزلہ بن یونس، خلیل الرحمان اور عبداللہ آصف شامل تھے۔ اس کے علاوہ پاکستان کی نیشنل یونیورسٹی آف کمپیوٹر اینڈ ایمرجنگ سائنسز (FAST-NUCES) کی ٹیم "i+1” بھی فائنلسٹ رہی، جنہوں نے AI پر مبنی ایسا سسٹم تیار کیا جو نیوروڈائیورجینٹ افراد کے لیے پیچیدہ مواد کو سمجھنے میں آسانی فراہم کرتا ہے۔ فلپائن میں پاکستان کی سفیر ڈاکٹر آسیما ربانی نے دونوں ٹیموں کی میزبانی کرتے ہوئے ان کی کامیابی کو سراہا اور کہا کہ یہ کارنامے پاکستان کی نوجوان نسل کی اختراعی صلاحیتوں اور عالمی سطح پر ابھرتی ہوئی ٹیکنالوجی میں شمولیت کا ثبوت ہیں۔
