پاکستان کا ڈیفالٹ رسک سب سے زیادہ کم، ابھرتی معیشتوں میں سرفہرست

پ

(مشرق نامہ) – عالمی مالیاتی ادارے بلوم برگ نے پاکستان کو ابھرتی ہوئی معیشتوں میں سب سے زیادہ بہتری دکھانے والا ملک قرار دیا ہے۔ بلوم برگ انٹیلی جنس کی حالیہ رپورٹ کے مطابق، پاکستان کا سورین ڈیفالٹ رسک پچھلے 12 ماہ میں 59 فیصد سے کم ہو کر 47 فیصد ہو گیا ہے — یعنی 11 فیصد پوائنٹس کی کمی، جو دنیا بھر کی ابھرتی معیشتوں میں سب سے نمایاں ہے۔

یہ بہتری عالمی سرمایہ کاروں کے اعتماد کی بحالی، معاشی استحکام، ساختی اصلاحات، آئی ایم ایف سے کامیاب مذاکرات، بروقت قرضوں کی ادائیگی اور بین الاقوامی کریڈٹ ریٹنگ ایجنسیوں جیسے فِچ اور ایس اینڈ پی کی طرف سے مثبت ریٹنگ کی مرہونِ منت ہے۔

وزیر خزانہ کے مشیر خرم شہزاد نے سوشل میڈیا پلیٹ فارم X پر اس کامیابی کو اجاگر کرتے ہوئے کہا کہ پاکستان نے عالمی سطح پر نمایاں کارکردگی کا مظاہرہ کیا ہے۔ ان کے مطابق، یہ کامیابی معاشی ٹیم کی انتھک محنت اور دیرپا پالیسیوں کا نتیجہ ہے۔

وزیراعظم شہباز شریف نے بھی بلوم برگ کی رپورٹ کا خیرمقدم کرتے ہوئے کہا کہ یہ پاکستان کی معاشی استحکام اور اہم ادارہ جاتی اصلاحات کا عالمی اعتراف ہے۔ انہوں نے کہا کہ حکومت کی مسلسل کاوشیں پاکستان کو ایک مضبوط معاشی مستقبل کی جانب لے جا رہی ہیں۔