اسلام آباد (مشرق نامہ) : اتوار کی صبح پاکستان کے وسطی علاقے میں ایک ہلکا زلزلہ آیا، جس کی شدت امریکی جیولوجیکل سروے (USGS) کے مطابق ریکٹر اسکیل پر 5.3 تھی، جبکہ جرمن ریسرچ سینٹر برائے جیوسائنسز (GFZ) نے اسے 5.5 شدت کا قرار دیا۔
یہ زلزلہ صبح 3:30 بجے (پاکستانی وقت) آیا، جس کا مرکز بلوچستان کے پہاڑی شہر بارکھان سے شمال شمال مشرق میں 60 کلومیٹر کے فاصلے پر تھا۔ زلزلہ سطح زمین کے قریب تھا، لیکن فوری طور پر کسی جانی یا مالی نقصان کی اطلاع نہیں ملی۔
یورومیڈیٹرینین سیسمولوجیکل سینٹر کے مطابق زلزلے کا مرکز ملتان سے 149 کلومیٹر مغرب میں تھا، جب کہ GFZ کے مطابق اس کی گہرائی 10 کلومیٹر تھی۔
مزید برآں، موسیٰ خیل اور قریبی علاقوں میں بھی زلزلے کے جھٹکے محسوس کیے گئے۔ سیسمک مانیٹرنگ سینٹر کے مطابق زلزلے کی شدت 5.5 اور گہرائی 28 کلومیٹر تھی، جبکہ مرکز موسیٰ خیل سے شمال مشرق میں تقریباً 56 کلومیٹر کے فاصلے پر تھا۔
حکام صورتحال کا جائزہ لے رہے ہیں، اور اب تک کوئی جانی یا مالی نقصان رپورٹ نہیں ہوا۔
پاکستان، بھارتی اور یوریشین ٹیکٹونک پلیٹوں کے سنگم پر واقع ہونے کی وجہ سے زلزلوں کی زد میں رہتا ہے۔
2005 میں آزاد کشمیر میں آنے والے 7.6 شدت کے زلزلے میں 73 ہزار سے زائد افراد جاں بحق ہوئے، جب کہ 2015 میں پاکستان اور افغانستان میں 7.5 شدت کے زلزلے میں تقریباً 400 افراد جان سے گئے تھے۔ بلوچستان میں 2021 کے زلزلے میں بھی 20 افراد جاں بحق ہوئے تھے۔
