اسلام آباد: وزیراعظم شہباز شریف کی قطر اور سعودی عرب کے سفیروں سے ملاقات، ایران-امریکہ کشیدگی پر تشویش کا اظہار
وزیراعظم شہباز شریف نے پیر کے روز قطر اور سعودی عرب کے سفیروں سے ملاقات کی اور دوحہ میں امریکی فوجی اڈے پر ایرانی میزائل حملے کے بعد پیدا ہونے والی تازہ کشیدگی پر گہری تشویش کا اظہار کیا۔ وزیراعظم نے خطے میں امن و استحکام کی اہمیت پر زور دیتے ہوئے کہا کہ پاکستان کسی بھی قسم کی کشیدگی کو کم کرنے کے لیے سفارتی کوششوں کی حمایت کرتا ہے۔ انہوں نے دونوں برادر ممالک کے ساتھ قریبی تعاون اور مشاورت جاری رکھنے کے عزم کا اعادہ کیا۔
اسلام آباد: وزیراعظم شہباز شریف کی قطری سفیر سے ملاقات، کشیدگی میں کمی اور علاقائی امن پر زور
وزیراعظم شہباز شریف نے قطر کے سفیر علی مبارک علی عیسیٰ الخاطر سے ملاقات میں دوحہ میں امریکی اڈے پر ایرانی میزائل حملے کے بعد پیدا ہونے والی صورتحال پر گفتگو کی اور اس نازک موقع پر قطری حکومت اور عوام سے یکجہتی کا اظہار کیا۔
وزیراعظم نے کہا کہ:اس مشکل وقت میں تمام فریقین کو کشیدگی کم کرنے اور خطے میں امن بحال کرنے کے لیے ہر ممکن کوشش کرنی چاہیے۔
قطری سفیر نے اس غیر متوقع واقعے کے بعد فوری رابطہ کرنے اور یکجہتی کے اظہار پر وزیراعظم کا شکریہ ادا کیا۔ انہوں نے کہا کہ پاکستان کی قیادت کی یہ حمایت قطر کے لیے نہایت قابلِ قدر ہے۔
اسلام آباد: وزیراعظم کی سعودی سفیر سے ملاقات، مشرق وسطیٰ میں امن کی کوششیں تیز کرنے پر اتفاق
وزیراعظم شہباز شریف نے سعودی عرب کے سفیر نواف بن سعید المالکی سے ملاقات میں قطر میں امریکی فوجی اڈے پر میزائل حملے کی اطلاعات پر سنجیدہ تشویش کا اظہار کیا۔ انہوں نے کہا کہ پاکستان خطے میں امن و استحکام کے لیے سعودی عرب کے ساتھ قریبی تعاون جاری رکھے گا۔
وزیراعظم نے اس بات پر زور دیا کہ:مشرق وسطیٰ میں جاری تنازع کے پُرامن حل کے لیے تمام کوششیں تیز کی جائیں، تاکہ کشیدگی میں کمی اور امن کی بحالی ممکن ہو۔
سعودی سفیر نواف المالکی نے مشکل وقت میں فوری رابطے پر وزیراعظم کا شکریہ ادا کیا اور اس بات سے اتفاق کیا کہ سعودی عرب اور پاکستان کو مشترکہ طور پر اور قریبی ہم آہنگی کے ساتھ کام کرتے رہنا چاہیے تاکہ مشرق وسطیٰ میں جاری بحران کا جلد پُرامن حل نکالا جا سکے۔
