ٹرمپ اور نیتن یاہو کی زبان عالمی عقائد و قانون کی توہین قرار
دانشگاه (نیوز ڈیسک) تہران:
ایران کی مذہبی اقلیتوں نے اسلامی انقلاب کے رہبر آیت اللہ سید علی خامنہ ای کے خلاف قتل کی دھمکیوں کو نہ صرف ایک فرد پر حملہ بلکہ عالمی عقیدتی حرمت اور مذہبی وقار کی سنگین پامالی قرار دیا ہے۔
ہفتے کے روز جاری ہونے والے ایک متفقہ بیان میں ایران کی عیسائی، یہودی، زرتشتی اور صابئی مندائی برادریوں کے ممتاز مذہبی رہنماؤں نے امریکہ کے سابق صدر ڈونلڈ ٹرمپ اور اسرائیلی وزیر اعظم بنیامن نیتن یاہو کی دھمکیوں کو بین الاقوامی قانون، اقوام متحدہ کے منشور، اور عالمی اخلاقی ضوابط کے خلاف قرار دیا۔
بیان میں کہا گیا کہ الٰہی رہنماؤں اور مذہبی شخصیات پر حملہ، کروڑوں دینداروں کے عقائد اور جذبات پر حملے کے مترادف ہے۔ ایسے حملے مذہبی تشخص، روحانی میراث، اور بین المذاہب احترام کے خلاف صریح اشتعال انگیزی ہیں۔
رہنماؤں نے خبردار کیا کہ کسی بھی خودمختار ریاست کے اعلیٰ ترین مذہبی و سیاسی رہنما کو قتل کی کھلی دھمکی دینا اقوام متحدہ کے چارٹر اور بین الاقوامی سفارتی قوانین کی کھلی خلاف ورزی ہے۔ ان کا کہنا تھا کہ اگر ایسی دھمکیاں سنگین اور فوری نوعیت کی ہوں تو اقوام عالم کو پیشگی دفاع کے حق کو تسلیم کرنا ہوگا۔
بیان میں عالمی برادری، اقوام متحدہ کی سلامتی کونسل، بین الاقوامی مذہبی اداروں اور قانونی تنظیموں سے مطالبہ کیا گیا کہ وہ ان دھمکیوں پر "واضح، مؤثر اور فیصلہ کن” ردعمل دیں۔
مذہبی اقلیتوں کے رہنماؤں نے اس بات پر زور دیا کہ اگر ان دھمکیوں کا بروقت سدباب نہ کیا گیا تو اس کے ردعمل میں خطے سمیت دنیا بھر میں بڑے پیمانے پر غیر متوقع اور قابو سے باہر جذباتی ردعمل دیکھنے میں آ سکتا ہے۔
یہ ردعمل اس وقت سامنے آیا ہے جب اسرائیلی حکومت نے گزشتہ ہفتے ایران پر اچانک اور بلااشتعال حملے کیے، جن میں متعدد ایرانی فوجی کمانڈرز، جوہری سائنسدان اور معصوم شہری بشمول خواتین و بچے شہید ہوئے۔ انہی حملوں کے جواب میں ایران نے آپریشن وعدۂ صادق ۳ کا آغاز کرتے ہوئے مقبوضہ فلسطینی علاقوں میں اسرائیل کے حساس فوجی اور انٹیلی جنس مراکز کو نشانہ بنایا۔
بیان پر دستخط کرنے والی مذہبی شخصیات درج ذیل ہیں:
بشپ نرساے بنیامین — ایران، آرمینیا اور جارجیا میں آشوری چرچ کے سربراہ
واروش آوانسیان — تہران و شمالی ایران کی آرمینیائی خلافت کونسل کے چیئرمین
ربی یونس حامی لالہ زار — ایران کی یہودی برادری کے رہنما
موبد مہربان پولادی — ایرانی زرتشتی انجمن کے صدر
گنزورا نجات چاہیلی — ایران کی صابئی مندائی برادری کے مذہبی پیشوا
