وزیراعظم شہباز شریف نے پیر کے روز کراچی میں منعقدہ پاکستان انٹرنیشنل میری ٹائم ایکسپو اینڈ کانفرنس (PIMEC 2025) کے افتتاحی سیشن سے خطاب کرتے ہوئے "پاکستان میری ٹائم وژن 2030” کا باضابطہ اعلان کیا۔ اپنے خطاب میں انہوں نے نیلی معیشت (Blue Economy) کو پاکستان کی اقتصادی ترقی کے لیے ایک "گیم چینجر” قرار دیا اور کہا کہ سمندری وسائل سے بھرپور استفادہ کر کے ملک میں معاشی استحکام اور روزگار کے بے شمار مواقع پیدا کیے جا سکتے ہیں۔
وزیراعظم نے اس بات پر زور دیا کہ پاکستان کے پاس ایک وسیع سمندری پٹی موجود ہے جو وسائل سے مالا مال ہے، لیکن ماضی میں ان مواقع سے بھرپور فائدہ نہیں اٹھایا گیا۔ میری ٹائم وژن 2030 کا مقصد بندرگاہوں کی ترقی، جدید شپ یارڈز کے قیام، سمندری سیاحت کے فروغ، سمندری تحقیق اور تعلیم میں سرمایہ کاری کو فروغ دینا ہے۔ انہوں نے نجی شعبے کو اس شعبے میں سرمایہ کاری کی دعوت دی تاکہ معیشت کو نئی جہت دی جا سکے۔
شہباز شریف نے متعلقہ اداروں کو ہدایت کی کہ وہ میری ٹائم پالیسیوں کو عالمی معیارات کے مطابق مرتب کریں اور سمندری ماحول کے تحفظ کو یقینی بنائیں۔ انہوں نے پاک بحریہ اور دیگر اداروں کو ایک کامیاب میری ٹائم ایکسپو کے انعقاد پر مبارکباد دی اور اس امید کا اظہار کیا کہ پاکستان مستقبل میں خطے کا اہم میری ٹائم مرکز بن کر ابھرے گا۔
