اسحاق ڈار اور ترک ہم منصب کے درمیان اسرائیلی اقدامات کے ممکنہ اثرات پر گفتگو

ا

ایران-اسرائیل کشیدگی کے دوران 450 پاکستانی زائرین کو ایران سے نکال لیا گیا، مزید انخلاء جاری

اسلام آباد: ایران اور اسرائیل کے درمیان شدید فوجی کشیدگی کے دوران حکومت پاکستان نے تصدیق کی ہے کہ 450 پاکستانی زائرین کو ایران سے بحفاظت نکال لیا گیا ہے، جبکہ ایران اور عراق سے مزید پاکستانیوں کے انخلاء کا عمل بھی جاری ہے۔

گزشتہ جمعے کو اسرائیل نے ایران پر بڑے پیمانے پر فضائی حملے کیے، جن میں فوجی کمانڈرز، ایٹمی سائنس دان اور تنصیبات کو نشانہ بنایا گیا۔ اس حملے کے جواب میں ایران نے اسرائیل پر میزائل حملے کیے۔

نائب وزیر اعظم و وزیر خارجہ اسحاق ڈار نے ایکس (سابق ٹوئٹر) پر بتایا کہ حکومت پاکستانی شہریوں کی سلامتی اور فلاح و بہبود کے لیے تمام ضروری اقدامات کر رہی ہے۔ انہوں نے کہا کہ 154 طلباء سمیت ایران میں مقیم پاکستانیوں کی واپسی کا پہلا مرحلہ مکمل ہو چکا ہے۔

انہوں نے مزید بتایا کہ عراق میں فضائی حدود کی بندش کے باعث پھنسے پاکستانی زائرین سے پاکستانی سفارتخانہ مسلسل رابطے میں ہے اور ان کی محفوظ رہائش اور انخلاء کے اقدامات کیے جا رہے ہیں۔

دفتر خارجہ کے کرائسس مینجمنٹ یونٹ کا 24 گھنٹے ہیلپ لائن نمبر +92 51-9207887 اور ای میل cmu1@mofa.gov.pk جاری کیا گیا ہے۔

وزیر اعظم شہباز شریف نے بھی ہدایت جاری کی ہے کہ ایران میں موجود تمام پاکستانی زائرین کی حفاظت اور واپسی کے لیے ہر ممکن اقدامات کیے جائیں۔
دفتر خارجہ نے پاکستانی زائرین کو موجودہ سیکیورٹی صورتحال کے پیش نظر ایران اور عراق کے سفر پر نظرثانی کرنے کا مشورہ دیا ہے۔
پاکستانی سفیر برائے ایران، مدثر ٹیپو، اس وقت سرکاری ملاقاتوں کے سلسلے میں وطن میں موجود ہیں۔ دفتر خارجہ کے مطابق سفارتخانہ، وزیر خارجہ کی ہدایات کے مطابق تمام سہولیات فراہم کر رہا ہے۔

اسحاق ڈار اور ترک وزیر خارجہ کا رابطہ
دوسری جانب، اسحاق ڈار کو اتوار کے روز ترک وزیر خارجہ ہاکان فدان کی فون کال موصول ہوئی، جس میں دونوں رہنماؤں نے خطے کی بگڑتی ہوئی صورتحال اور اسرائیل کے ایران پر بلاجواز حملوں پر گہری تشویش کا اظہار کیا۔
ڈار نے اس بات کی تصدیق کی کہ وہ اگلے ہفتے استنبول میں ہونے والے او آئی سی وزرائے خارجہ کونسل اور اسلامی یوتھ فورم کی تقریب میں پاکستان کی نمائندگی کریں گے۔
وزیر اعظم شہباز شریف نے اس سے قبل ترک صدر رجب طیب اردوان سے گفتگو میں پاکستان کی شرکت کی یقین دہانی کرائی تھی۔ او آئی سی اجلاس 21 تا 22 جون کو استنبول میں منعقد ہو گا۔