اسلام آباد: پاکستان کو بالآخر ایک بڑا تکنیکی فروغ ملنے جا رہا ہے، کیونکہ ایلون مسک کی انٹرنیٹ سروس اسٹار لنک کو ملک میں عارضی رجسٹریشن دے دی گئی ہے۔
یہ پیش رفت جمعہ کے روز وفاقی وزیر برائے انفارمیشن ٹیکنالوجی اور ٹیلی کمیونیکیشن شزا فاطمہ خواجہ نے تصدیق کی۔ ان کے مطابق، وزیراعظم شہباز شریف کی ہدایات پر اسٹار لنک کو پاکستان میں عارضی رجسٹریشن دی گئی ہے۔
انہوں نے کہا، "تمام سیکیورٹی اور ریگولیٹری اداروں کی مشاورت سے اسٹار لنک کو عارضی این او سی (نو آبجیکشن سرٹیفکیٹ) جاری کر دیا گیا ہے۔”
پاکستان ٹیلی کمیونیکیشن اتھارٹی (PTA) اس کمپنی کی فیس ادائیگی اور دیگر لائسنسنگ شرائط پر عمل درآمد کی نگرانی کرے گی۔
وفاقی وزیر نے اسے پاکستان کی ڈیجیٹل تبدیلی کی جانب ایک اہم قدم قرار دیا اور کہا، "وزیراعظم نے پاکستان کے انٹرنیٹ انفراسٹرکچر کو بہتر بنانے کے لیے جامع اصلاحات کی ہدایات دی ہیں، اور اسٹار لنک کی رجسٹریشن اس سفر میں ایک بڑا سنگ میل ہے۔”
انہوں نے سیٹلائٹ انٹرنیٹ کی منظوری کو ایک بڑی پیش رفت قرار دیتے ہوئے کہا کہ "جدید حل، جیسے سیٹلائٹ انٹرنیٹ، خاص طور پر پاکستان کے پسماندہ اور دور دراز علاقوں میں کنیکٹیویٹی کو بہتر بنائیں گے۔”
انہوں نے مزید کہا کہ حکومت تمام متعلقہ اداروں کے ساتھ قریبی تعاون کے تحت اسٹار لنک کی رجسٹریشن کے عمل کو آسان بنانے کے لیے کام کر رہی ہے۔ اس سلسلے میں انہوں نے سائبر کرائم اور سیکیورٹی ایجنسیوں، پی ٹی اے، اور اسپیس اتھارٹی کے کلیدی کردار کو بھی سراہا۔
شزا فاطمہ خواجہ پر امید ہیں کہ اسٹار لنک کی پاکستان میں آمد ڈیجیٹل کنیکٹیویٹی کے ایک نئے دور کا آغاز کرے گی اور ڈیجیٹل خلا کو کم کرنے میں معاون ثابت ہوگی۔
اسپیس ایکس کے سربراہ ایلون مسک نے اس سے قبل کہا تھا کہ وہ پاکستان میں اسٹار لنک کے آغاز کے لیے حکومت کی منظوری کے منتظر ہیں۔
